Një vullnetare britanike në Ukrainë është gjetur e vdekur në kryeqytetin e vendit, Kiev.
Trupi i ish studentes së kimisë, Katherine Mielniczuk u gjet në orët e para të mëngjesit të së dielës nga pjesëtarët e njësisë së saj, njësia 151 e Forcave të Operacioneve Speciale.
Duke postuar në rrjetet sociale, organizata vullnetare ukrainase Project Konstantin tha: “Me keqardhje të thellë njoftojmë vdekjen e Katherine Mielniczuk, 26 vjeç.”
“Ne e morëm vesh këtë lajm të tmerrshëm disa orë më parë dhe pas bisedimeve me familjen e saj, ne i kemi ofruar ndihmë.”
“Gjithçka që dimë është se ajo u zbulua në shtratin e saj këtë mëngjes (24 dhjetor 2023), shkaku i vdekjes së saj në këtë fazë nuk po trajtohet si i dyshimtë. Informacione të mëtejshme do të jepen më vonë nga autoritetet.”
‘Kat’, siç njihej me dashuri, shërbeu si instruktore dhe mjeke luftarake me një grup që e quan veten Menace Medics.
Duke shkruar në blogun e saj, e diplomuarja e kimisë tha: “Në Menace Medics, qëllimi ynë është të ndihmojmë mjekët në terren me pajisje mjekësore kritike dhe riparime/karburant automjetesh, duke shpëtuar kështu jetën e luftëtarëve dhe ushtarëve ukrainas.”
Sipas një postimi në blogun e saj, ajo kishte kaluar 18 muajt e fundit si vullnetare në Ukrainë.
Autoritetet tani po përpiqen të përcaktojnë shkakun e vdekjes./vizionplus.tv
