Presidenti francez Emmanuel Macron po kërkon nisjen e shpejtë të një misioni ushtarak ndërkombëtar në Ngushticën e Hormuzit, pas marrëveshjes së arritur mes Shteteve të Bashkuar të Amerikës dhe Iranit për t’i dhënë fund luftës.
Në një intervistë për transmetuesin francez TF1, presidenti Macron deklaroi se prioriteti i parë është zbatimi i marrëveshjes dhe rihapja paqësore e kësaj rruge strategjike detare, në mënyrë që trafiku tregtar të rikthehet në normalitet.
“Do të bëjmë gjithçka që kjo marrëveshje të hyjë në fuqi dhe Ngushtica e Hormuzit të rihapet në mënyrë paqësore”, tha presidenti francez, duke shtuar se Franca është e gatshme të veprojë shumë shpejt.
Sipas Macron, Franca mund të dislokojë brenda dy deri në tre ditësh aeroplanmbajtësen “Charles de Gaulle”, fregata, anije për çminim dhe avionë ushtarakë në rajon, sapo të konfirmohet zyrtarisht armëpushimi.
Ai theksoi se operacioni do të zhvillohet në bashkëpunim me Shtetet e Bashkuara të Amerikës dhe në koordinim me Iranin, me synimin për të garantuar që rihapja e Ngushticës së Hormuzit të jetë e sigurt dhe afatgjatë.
Një mision detar i udhëhequr nga Franca dhe Britania e Madhe është planifikuar prej kohësh dhe pritet të nisë sapo luftimet të përfundojnë zyrtarisht. Objektivi kryesor është pastrimi i minave detare në ngushticë dhe shoqërimi i anijeve tregtare për të garantuar kalimin e sigurt.
Sipas presidentit Macron, më shumë se 40 vende kanë shprehur mbështetjen e tyre për këtë operacion, përfshirë edhe Gjermaninë.
