Sekretari amerikan i Shtetit Anthony Blinken ka zhvilluar një bisedë telefonike me homologun e tij turk Hakan Fidan për Gazën, zhvillimet në Lindjen e Mesme dhe dy krizat e rëndësishme në kontinentin afrikan.
Kreu i diplomacisë amerikane nënvizoi rëndësinë e kthimit të Hamasit në tryezën e bisedimeve për armëpushimin në Gaza dhe lirimin e pengjeve.
Siç theksohet në një deklaratë të Departamentit të Shtetit, “Sekretari i Shtetit Anthony Blinken foli sot me Ministrin e Jashtëm turk Hakan Fidan për rëndësinë e kthimit të Hamasit në negociata më 15 gusht me qëllim finalizimin e një marrëveshjeje armëpushimi të menjëhershëm dhe të qëndrueshëm.”
Në këtë kontekst, Anthony Blinken shprehu mirënjohjen e tij për mbështetjen e Turqisë në dy çështje kyçe.
E para ka të bëjë me mbështetjen e Ankarasë për deklaratën e përbashkët SHBA-Egjipt-Katar që kërkon rifillimin e bisedimeve për Gazën, e dyta lidhet me kontributin e saj në lirimin e të burgosurve amerikanë më 1 gusht.
Gjithashtu, të dy ministrat diskutuan nevojën urgjente për t’i dhënë fund dhunës në të gjithë territorin e Sudanit dhe rëndësinë e pjesëmarrjes së Forcave të Armatosura sudaneze dhe Forcave të Mbështetjes së Shpejtë në bisedimet e 14 gushtit në Zvicër.
Më tej, kreu i diplomacisë amerikane shprehu mbështetjen e tij për ndërmjetësimin e Turqisë midis Etiopisë dhe Somalisë./vizionplus.tv
