Pasi Izraeli kreu sulme në enklavën palestineze, duke vrarë të paktën 104 persona, në përgjigje të vrasjes së një ushtari izraelit, presidenti amerikan, Donald Trump, tha se armëpushimi në Gazë – që mbështetet nga Uashingtoni – nuk është në rrezik.
“Siç e kuptova, ata vranë një ushtar izraelit. Pra, izraelitët u kundërpërgjigjën dhe ata duhet të kundërpërgjigjen. Asgjë nuk do ta vërë në rrezik. Duhet ta kuptoni se Hamasi është një pjesë e vogël e paqes në Lindjen e Mesme dhe ata duhet të sillen mirë”, tha Trump.
Një zyrtar i ushtrisë në Tel Aviv tha se Hamasi e kishte shkelur armëpushimin duke kryer një sulm ndaj forcave izraelite që ishin të stacionuar brenda të ashtuquajturës “linjë të verdhë” – linjë për dislokimin e trupave.
Marrëveshja e armëpushimit që u ndërmjetësua nga SHBA-ja hyri në fuqi më 10 tetor, duke ndalur dy vjet luftë që u nxit nga sulmi i Hamasit ndaj Izraelit më 7 tetor 2023. Por që nga ai moment, të dyja palët kanë akuzuar njëra-tjetrën për shkelje të paktit.
Hamasi ka mohuar se qëndron prapa sulmit ndaj forcave izraelite në Rafah, në pjesën më jugore të Gazës, dhe përmes një njoftimi tha se vazhdon të respektojë marrëveshjen e armëpushimit./vizionplus.tv
