Bota e basketbollit është në zi pas ndarjes nga jeta të Michael Ray Richardson, një prej talenteve më të mëdhenj të NBA-së dhe idhull i tifozëve të Virtus Bologna.
Ish-lojtari i katërfishtë NBA All-Star u shua në moshën 70-vjeçare në Lawton, Oklahoma, pas një beteje të shkurtër me kancerin. Lajmi u konfirmua nga avokati dhe miku i tij i ngushtë, John Zelbst.
“Bota e basketbollit ka humbur një atlet të jashtëzakonshëm,” tha Zelbst. “Michael e jetoi jetën në maksimum dhe kapërceu sfida të jashtëzakonshme. Ai është shembull i një njeriu që arrin të shpengojë veten dhe të ngrihet mbi vështirësitë. Për mua, ai është lojtari më i madh i NBA-së që nuk u fut kurrë në Sallën e Famës.”
I njohur me nofkën “Sugar”, Richardson lindi në Denver dhe pas një karriere të suksesshme universitare u bashkua me New York Knicks në vitin 1978. Ai luajti aty deri në 1982, përpara se të kalonte te Golden State Warriors dhe më pas te New Jersey Nets. Sezoni i tij më i mirë erdhi në 1984-85, kur regjistroi mesatarisht 20.1 pikë, 8.2 asistime, 5.6 ribaunde dhe 3 vjedhje për ndeshje, duke fituar çmimin “Lojtari i Vitit i Rikthimit” në NBA.
Pas përjashtimit nga liga në vitin 1986 për shkelje të politikave antidrogë, Richardson rigjeti veten në Evropë. Nga viti 1988 deri në 1991 ai u bë idhull i Virtus Bologna, ku magjepsi tifozët me talentin e tij të jashtëzakonshëm. Karriera e tij europiane vazhdoi tek Jugoplastika, Libertas Livorno, Olympique Antibes, Forlì dhe sërish në Livorno, përpara se të mbyllte kapitullin e basketbollit duke u rikthyer në Antibes.
Vdekja e Michael Ray Richardson lë një boshllëk të madh në komunitetin e basketbollit, por trashëgimia e tij në NBA dhe në basketbollin europian do të kujtohet gjithmonë.
