Policia e Shkodrës shpalli në kërkim dy vëllezërit, Nazmi dhe Basri Malaj pasi sekuestroi një sasi të madhe lënde narkotike, fshehur në një tunel të ndërtuar gjatë periudhës së komunizmit.
Dy vëllezërit dyshohet se janë pjesë e një rrjeti të trafikut të lëndëve narkotike pasi edhe më herët, policia ka sekuestruar sasi të mëdha droge që çojnë kryesisht në të njëjtat të dhëna për sa i përket prodhuesve.
Të gjitha dyshimet nisin nga fakti se droga prodhohet nga e njëjta dorë, sepse edhe më herët, policia kapi marijuanë në formë çokollate, sërish në Shkodër, në të cilën ishte stampuar forma e një gjetheje.
Cilësia e lartë e marijuanës si edhe logoja bëjnë policinë të dyshojë se ajo prodhohet në të njëjtin vend, dhe më pas përdoren grupe nga Shkodra për ta dërguar në Malin e Zi.
Aksioni
Një ditë më parë policia e Shkodrës njoftoi se në kuadër të operacionit “territior i pastër” dhe “tempulli 2”, kishte sekuestruar 100 kilogram drogë e llojit marijuanë. 65.5 kilogram prej saj ishin në formë çokollate e gatshme për treg bashkë me logon sipër, kurse pjesa tjetër ishte në formë boçeje. Të dyja sasitë u kapën brenda një furgoni në afërsi të një tuneli të diktaturës.
Dy vëllezërit Malaj sipas policisë janë të dyshuar si personat që ishin në krye të kësaj veprimtarie kriminale ndërsa mendohet se është një rrjet kriminal shumë më i gjerë se kaq me persona të tjerë të përfshirë për të cilët policia po heton.
E njëjta dorë
Në 6 dhjetor të vitit të shkuar, në kuadër të operacionit “imazhi fals”, policia arrestoi 26-vjeçarin Ragip Sula dhe krahas armëve dhe pajisjeve të tjera të jashtëligjme i kapi edhe një sasi droge e llojit marijuanë, në formë çokollate sërish me të njëjtën stampë mbi ambalazh. Kjo ka bërë që policia të nisë hetimet për një grup më të madh kriminal që merret me prodhimin e kësaj droge dhe më pas përmes personazheve si vëllezërit Malaj apo të tjerë, e shpërndajnë atë brenda dhe jashtë vendit. /vizionplus.tv
