Ka shkaktuar një çarje të fortë diplomatike mes SHBA-së dhe Izraelit miratimi i rezolutës së OKB-së që bën thirrje për ndalimin e luftimeve në Gaza.
Ambasadori izraelit në OKB e konsideroi votimin si mungesë sinqeriteti për aq kohë sa u dënua me një zë sulmi terrorist në Rusi, ndërkohë që sipas tij duhej bërë e njëjta gjë edhe për sulmin e Hamasit në 7 tetor.
Ndërkohë, izraelitët janë të acaruar me SHBA-në pasi ajo nuk bllokoi rezolutën e OKB që kërkon ndalimin e luftimeve duke abstenuar përballë 14 votave pro të anëtarëve të këshillit.
Nisur nga kjo, delegacioni izraelit ka njoftuar se nuk do të shkojë këtë javë në SHBA pas kësaj që ndodhi në OKB, ndërkohë që amerikanët janë shprehur se do të mundësonin bindjen e izraelitëve dhe vijimin e dialogut.
ÇFARË NDODHI SOT
- Pas gati gjashtë muajsh luftime, Këshilli i Sigurimit i OKB-së miratoi një rezolutë që bën thirrje për një armëpushim të menjëhershëm ndërsa SHBA-ja nuk vuri veton, por abstenoi.
- Kryeministri izraelit Benjamin Netanyahu reagoi duke anuluar një vizitë të delegacionit izraelit në Shtëpinë e Bardhë këtë javë, ndërsa përfaqësuesi i përhershëm i Izraelit në OKB u tha anëtarëve të Këshillit se ishte “i neveritur” nga vendimi i tyre për të miratuar rezolutën.
- Shtëpia e Bardhë tha se abstenimi i saj nuk përfaqësonte një ndryshim në politikë dhe ishte rezultat i formulimit përfundimtar të rezolutës që nuk dënonte sulmin e Hamasit të 7 tetorit ndaj Izraelit – por Netanyahu këmbënguli se ishte “një tërheqje e qartë”.
Një çarja e fortë SHBA-Izrael
Jeremy Bowen-BBC
Për javë të tëra, presidenti Joe Biden dhe zyrtarët e tij të lartë kanë treguar se po humbasin durimin me mënyrën se si Izraeli po lufton në Gaza.
Vendimi për të mos bllokuar rezolutën e armëpushimit heq, për momentin, mbrojtjen diplomatike nga Izraeli në Këshillin e Sigurimit të OKB-së – dhe tregon thellësinë e çarjes që është hapur me kryeministrin e Izraelit Benjamin Netanyahu.
Ai dënoi SHBA-në, duke thënë se vendimi për të mos përdorur veton dëmton përpjekjet e luftës dhe përpjekjet për të liruar pengjet nga Hamasi.
Pas votimit, ambasadori amerikan në Këshillin e Sigurimit e quajti rezolutën jo detyruese. Zakonisht rezolutat e Këshillit të Sigurimit konsiderohen se kanë fuqinë e ligjit.
Presidenti Biden dëshiron lirimin e pengjeve si dhe shkatërrimin e Hamasit si forcë ushtarake.
Por që nga fillimi i luftës, ai i ka thënë Izraelit duhet të respektojë ligjin ndërkombëtar humanitar – i cili përfshin një detyrim për të mbrojtur civilët.
Izraelitët mohojnë se bllokojnë ndihmën humanitare – por amerikanët mund të shohin provat se Gaza është në prag të urisë, me fëmijë që vdesin nga uria disa milje larg dyqaneve të bollshme ushqimore në Izrael dhe Egjipt.
Aleanca SHBA-Izrael është e thellë, por nganjëherë është shumë jofunksionale. Krizat ndodhin kur Izraeli sfidon dëshirat e presidentëve amerikanë.
Kjo nuk është hera e parë që Benjamin Netanyahu ka zemëruar krerët në Shtëpinë e Bardhë – ai e ka bërë këtë rregullisht që kur u bë për herë të parë kryeministër i Izraelit në 1996.
Por asnjë krizë në aleancën e gjatë SHBA-Izrael nuk ka qenë aq serioze sa ajo që u zhvillua në pothuajse gjashtë muajt e luftës së Gazës.
/vizionplus.tv
