Të punësuarit në Postën e Maqedonisë sot kanë dalë në protesta, prej ku bënë thirrje për riorganizim dhe sistematizim të kompanisë, e cila siç thanë, ballafaqohen me probleme të mëdha kadrovike, mungesë të personalit në procesin teknologjik dhe mospagesë të rregullt të pagave.
Kryetari i Sindikatës së Postës, Boro Veligdenov, tha se me gjendjen e tanishme, të punësuarit janë të shqetësuar për të ardhmen dhe vendet e punës.
“70 përqind e të punësuarve janë me paga nën minimalen, ndërsa paga e shkurtit ende nuk është paguar edhe përkundër faktit që afati është deri me të 15. Gjendja financiare e kompanisë është e keqe dhe kemi frikë se nuk do të ketë pagesë të rregullt të pagave”, tha Veligdenov.
Ai shtoi se ka mungesë të punonjësve në procesin teknologjik – postierë, sportele dhe punëtorë, ndërsa ka vende të stërmbushura në administratë dhe pozitat e shefave.
“Kemi nga një shef për çdo punëtor”, tha ai.
Aktualisht Posta e Maqedonisë ka 1800 të punësuar dhe 200 postierë me kontratë, ndërsa sindikata kërkon ndër të tjera që të zgjidhet statusi i postierëve me kontratë, të cilët prej vitesh punojnë pa sigurim shëndetësor dhe me pagë minimale.
Ka gjithashtu largim të punonjësve që japin dorëheqjen vetë, veçanërisht punonjësit e procesit teknologjik.
Veligdenov tha se Sindikata ka vite që jep alarmin për reforma dhe riorganizim, por autoritetet nuk po dëgjojnë./Telegrafi/
Punonjësit e Postës së Maqedonisë në protesta – “Çdo punëtor ka nga një shef” appeared first on Telegrafi.