“Për të ruajtur jetën dhe rrethimin, unë i kam tërhequr njësitë tona nga Avdiivka.”
Kreu i ri i forcave të armatosura të Ukrainës, gjenerali Oleksandr Syrskyi, tha se “më mirë do të tërhiqej sesa të sakrifikonte jetë” dhe kjo është ajo që ai bëri në Avdiivka.
Pavarësisht se rusët pësuan humbje të mëdha, katër muaj sulmesh të pamëshirshme i kanë lënë trupat ukrainase atje në numër më të vogël, të armatosur keq dhe me municion që pakësohet dita ditës.
Kjo është fitorja më e madhe e Moskës që nga kundërofensiva e dështuar e Ukrainës vitin e kaluar.
Avdiivka u pushtua për pak kohë nga Rusia në 2014 përpara se të rimerrej nga Ukraina.
Por, çfarë do të thotë rënia e Avdiivkës për Ukrainën dhe Rusinë?
Madhësia ka më shumë rëndësi se kurrë
Duke qenë se kjo tani është një luftë që fitohet nga ai që i shkakton më shumë dëme kundërshtarit, diferenca që kanë Rusia dhe Ukrainë po bëhet e dukshme më shumë se kurrë tani.
Popullsia e Rusisë prej 144 milionë banorësh është më shumë se katër herë më e madhe se ajo e Ukrainës.
Pavarësisht humbjes së mijëra ushtarëve në këtë luftë, Moska ka mundur t’i zëvendësojë shumë shpejt.
Edhe forcat ukrainase kanë pësuar humbje, por jo në të njëjtën masë.
Ashtu si me vendbanimet e tjera ukrainase në vijën e frontit, Rusia ka pushtuar një qytet pothuajse tërësisht të shkatërruar.
Brigada e tretë Sulmuese e Ukrainës, e cila u vendos atje, tha se ata po sulmoheshin nga këmbësoria ruse në të gjitha drejtimet.
Rusia ka përqendruar luftëtarët e saj më të trajnuar në zonë dhe besohet se hidhte deri në 60 bomba në ditë në pozicionet ukrainase.
Herën e fundit që një qytet ukrainas si Bakhmuti u pushtua nga rusët, gjenerali Syrskyi u kritikua se e mbajti atë për një kohë të gjatë. Ai u akuzua për një fitore simbolike në kurriz të viktimave të panevojshme.
Përvoja duket se e ka ndryshuar këtë qasje
Ndikimet afatmesme
Ky përparim rus nuk ka ndodhur brenda natës. Që nga tetori i kaluar, Moska ka nisur valë pas vale sulmet drejt Avdiivkas.
Ukrainasit munden t’i përballojnë sulmet ruse për një kohë të gjatë për shkak të pozicioneve të fortifikuara duke shkatërruar shumë teknikë ushtarake të Putinit.
Tani duket se trupat ruse kanë depërtuar në llogoret, të cilat janë përforcuar gjatë 10 viteve që nga fillimi i fushatës së agresionit të Moskës.
“Rusia nuk mund të arrijë qëllime strategjike, vetëm taktike,” thotë Maj Rodion Kudryashov, një zëvendës komandant ukrainas i Brigadës së 3-të Sulmuese.
Ai thotë se trupat e tij janë në një raport më shumë se shtatë me një. “Është si të luftosh dy ushtri”.
Ai është i bindur se rusët nuk do të shtyjnë më tej në qytete si Pokrovsk dhe Kostyantynivka, por kjo nuk është aspak e garantuar.
Thjesht kjo fitore e rusëve sipas tij do të ulë presionin ndaj qytetit të Donetskut, 15 km larg vijës së frontit.
Ndikimet afatgjate
Ukraina është detyruar të tërhiqet siç ka ndodhur edhe më parë, veçanërisht në verën e vitit 2022.
Njësi të mëdha ruse të pajisura mirë rrethuan qytete si Lysychansk dhe Severodonetsk ku ukrainasit e kishin të pamundur t’i përballonin.
Megjithatë, një fluks i mëvonshëm i armëve perëndimore dhe frymëzimi çoi në një ndryshim të situatës me trupat ukrainase që çliruan zonat në rajonet Kherson dhe Kharkiv.
Por kjo është një luftë tjetër tani.
Politika globale ka një ndikim më të rëndësishëm në fushën e betejës.
Ndihma e kufizuar perëndimore ka kontribuar drejtpërdrejt në këtë tërheqje të ukrainase në Avdiivka.
SHBA kryeson në sigurimin e armëve për Ukrainën, për shkak të shkallës dhe shpejtësisë që mund t’i sigurojë ato. Me një paketë prej 95 miliardë dollarësh që përfshin ndihmën për Ukrainën ende të pa miratuar në Uashington, aleatët e tjerë po luftojnë për të mbushur boshllëkun.
Kjo do të thotë se ukrainasit duhet të racionojnë municionin dhe të menaxhojnë moralin e ulët. Dhe Avdiivka mund të mos jetë e vetmja tërheqje që po shqyrton Kievi.
Presidenti rus Vladimir Putin gjithashtu dëshiron ende të marrë të gjithë Ukrainën, dhe është ende e mundur që ai mund ta bëjë atë.
Kjo perspektivë ose mund të rivendosë unitetin perëndimor në përpjekjen për ta parandaluar atë, ose të ushqejë skepticizmin se Ukraina nuk ishte në gjendje ta fitonte kurrë këtë luftë, pavarësisht mbrojtjes së jashtëzakonshme që ka shfaqur në Avdiivka dhe gjetkë. /vizionplus.tv
