Seanca e sotme plenare është shoqëruar me debate mes deputetëve të Partisë Demokratike dhe kreut të Grupit Parlamentar të PS, Taulant Balla, lidhur me kërkesën e opozitës për zhvillimin e menjëhershëm të një mocioni me debat mbi raportin e Departamentit Amerikan të Shtetit (DASH) për klimën e investimeve në Shqipëri.
Mazhoranca propozoi që mocioni të zhvillohet më 14 maj, propozim që u miratua me votë në Kuvend, pavarësisht kundërshtimeve të opozitës, e cila e cilësoi këtë vendim si shkelje të hapur të rregullores. Bardhi argumentoi se rregullorja parashikon që, në mungesë të dakordësisë, data e zhvillimit të mocionit nuk mund të jetë më vonë se 30 ditë nga paraqitja e kërkesës.
Sipas tij, kërkesa e opozitës mban datën 5 nëntor 2025, çka e bën të pajustifikuar shtyrjen e debatit deri në muajin maj.
“Nuk mund të llogariten 30 ditë si 5 muaj. Kjo është një shkelje e qartë e rregullores dhe një praktikë që po përsëritet në çdo seancë”, deklaroi Bardhi.
Përplasjet më pas u zhvendosën te procesi i integrimit të vendit në BE.
Kreu i Grupit Parlamentar të PS-së, Taulant Balla hodhi poshtë akuzat për mungesë angazhimi në procesin e integrimit europian, duke theksuar se qeveria ka përmbushur detyrimet e saj.
Ai iu drejtua deputetëve demokratë me tone ironike, duke i quajtur “dashnorët e rinj” të anëtarësimit në Bashkimin Europian dhe duke theksuar se, që nga fillimi i legjislaturës në shtator, opozita nuk ka dhënë asnjë votë pro për ligjet që lidhen me këtë proces.
Në përgjigje, kreu i Grupit Parlamentar të PD, Gazment Bardhi, akuzoi mazhorancën për mungesë transparence, duke deklaruar se opozita nuk është vënë në dijeni për listën e ligjeve që lidhen me integrimin, pavarësisht kërkesave të përsëritura. Sipas tij, kjo listë është kërkuar më shumë se 10 herë në Konferencën e Kryetarëve, por nuk është bërë publike.
“Ju nuk denjoni të informoni opozitën se cilat janë ligjet e nevojshme për procesin e integrimit. Vini këtu dhe tundni një listë, ndërkohë që ne nuk dimë se për cilat ligje bëhet fjalë”, u shpreh Bardhi, duke kërkuar bashkëpunim dhe transparencë nga mazhoranca.
Ndërkohë, kryetari i Kuvendit, Niko Peleshi, mohoi ekzistencën e një liste të tillë të fshehur, duke theksuar se në institucion nuk mbahet apo fshihet asnjë dokument i këtij lloji që lidhet me procesin e integrimit.
