Kryetari i Grupit Parlamentar të Partisë Demokratike, Gazment Bardhi, ka kërkuar nga Ministrja e Brendshme, Albana Koçiu, një sqarim zyrtar për dhunën e ushtruar nga policia gjatë protestës së opozitës më 24 janar.
Në fjalën e tij në Parlament, Bardhi akuzoi Drejtorin e Policisë së Shtetit, Ilir Proda, për lidhje me krimin e organizuar dhe e përshkroi atë si “ushtar të Suel Celës dhe klaneve të troplinëve”.
Ai ngriti gjithashtu shqetësimin për përdorimin e gazit lotsjellës të skaduar nga policia gjatë protestës, duke theksuar se efektet e tij vazhdojnë të ndikojnë edhe pas ngjarjes.
“Tregoni se sa serioz jeni ju kryetar se propozimi që vjen nga PS është të heqim ligjet nga rendi i ditës se duhet t’i konsultojmë me KE. Kjo ishte arsyeja për të hequr 4 projekt ligje nga rendi i ditës. Ju nuk jeni kujdesur minimalisht që përpara se të hartosh rendin të kontrollosh nëse ka ose jo konsultim. kërkesa e Blushit, është kërkesë që nuk ka nevojë të vijë me shkrim, mjafton ta paraqesë një grup parlamentar dhe mbështetet me ngritjen në këmbë të deputetëve, që ministrja të japë llogari për dhunën policore ndaj qytetarëve të pafajshëm nga policia e drejtuar nga një kryekriminel si Ilir Proda, ushtar u Suel Çelës dhe klanit të Troplinëve. Duhet të japë shpjegim për përdorimin e lëndëve të skaduara. Kjo është një kërkesë që duhet ta hidhni në votim”, tha Bardhi.
/vizionplus.tv
