Vetëm 18% e gjermanëve do ta mbështesnin një vendim të kancelarit Friedrich Merz për të kandiduar sërish për mandatin e dytë, sipas një sondazhi të publikuar sot nga Instituti Forsa për rrjetin RTL.
Sipas rezultateve, 73% e të anketuarve thanë se nuk do ta aprovonin një kandidim të ri të kreut të Unionit Kristian Demokratik (CDU) në zgjedhjet federale të vitit 2029.
Edhe brenda kampit të djathtë, mbështetja për Merz nuk është unanime. Vetëm 47% e përkrahësve të Unionit Kristian (CDU/CSU) do ta mbështesnin për një mandat të dytë, ndërsa 41% do të ishin kundër.
Merz, i cili mbush 70 vjeç nesër, shihet nga shumica si figurë me përvojë, por edhe si përfaqësues i një brezi të vjetër politik. Mbi gjysmën e të anketuarve (52%) shprehën mendimin se “do të ishte më mirë që kancelari të ishte më i ri në moshë”.
