Kremlini është kundërpërgjigjur pas urdhrit të Donald Trump për të rifilluar testimin e armëve bërthamore, pas një ndërprerjeje 33-vjeçare.
Presidenti amerikan të enjten urdhëroi ushtrinë amerikane të rifillojë menjëherë testimet e armëve bërthamore, pak minuta para se të takohej me Presidentin kinez Xi Jinping.
Trump tha se për shkak të “programeve të testimit të vendeve të tjera”, Shtetet e Bashkuara do të rifillojnë testimet “në kushte të barabarta”.
Në përgjigje të këtyre deklaratave, zëdhënësi i Kremlinit, Dmitry Peskov, tha se Rusia nuk ishte në dijeni të ndonjë vendi që kryente teste të tilla.
“Presidenti Trump përmendi në deklaratën e tij se vende të tjera po kryejnë teste të armëve bërthamore. Deri më tani, nuk e dinim që dikush po e bën këtë”, u tha Peskov gazetarëve.
Ai shtoi se Moska nuk kishte marrë asnjë paralajmërim ose informacion nga Uashingtoni në lidhje me një ndryshim në qëndrimin e SHBA-së ndaj testeve bërthamore. I pyetur nëse deklaratat e Trump sinjalizonin fillimin e një gare të re armatimesh, Peskov u përgjigj: “Jo veçanërisht”.
Vladimir Putin ka thënë vazhdimisht se nëse ndonjë vend kryen një provë bërthamore, Rusia do të përgjigjet me të njëjtën monedhë.
“Dua të kujtoj deklaratën e Presidentit Putin, e cila është përsëritur shumë herë: nëse dikush tërhiqet nga traktati, Rusia do të bëjë të njëjtën gjë”, tha Peskov.
Rusia post-sovjetike nuk ka kryer kurrë një provë bërthamore. Testi i fundit i Bashkimit Sovjetik ishte në vitin 1990, ai i Shteteve të Bashkuara në vitin 1992 dhe ai i Kinës në vitin 1996.
