Të refuzosh që të shërbesh një kafe, apo të ndezësh dritat e gjata të makinës, ka treguar se në Shqipëri jeta dhe vdekja janë shumë afër njëra-tjetrës. Shqetësuese është fakti se mjafton një debat për këto arsye banale që gjakrat të ndizen dhe të prodhohen masakra me viktima.
Siguria publike duket e cenueshme pikërisht për faktin se njerëz problematikë qarkullojnë të armatosur ditë e natë. Këtë fakt e dëshmojnë edhe shifrat e policisë, ku nga janari deri më tani janë sekuestruar rreth 506 armë zjarri, të llojeve të ndryshme, kryesisht pistoleta, kallashnikovë, armë të modeleve të vjetra apo edhe ato më të sofistikuara të viteve të fundit.
Blutë kanë arrestuar afro 600 persona këtë vit, të akuzuar për armëmbajtje pa leje, e mbi 600 të tjerë janë proceduar në gjendje të lirë, ndërkohë që në kërkim janë afro 70 të tjerë.
Ndonëse deri në vitin 2020 problem kanë qenë armët e marra nga depot e ushtrisë në vitin 1997, vitet e fundit trafiku ndërkombëtar i armëve është zgjeruar. Shumë operacione kundër këtij trafiku nxorën në skenë grupe kriminale që merrnin armë nga Evropa dhe më pas, përmes Kosovës, i sillnin në Shqipëri, armë që kanë rezultuar të prodhimeve të reja dhe të sofistikuara, me silenciatorë etj.
Referuar të dhënave zyrtare, edhe në vitin 2024 është paraqitur e njëjta situatë problematike, konkretisht me 644 armë zjarri të sekuestruara dhe 701 persona të prangosur.
Kodi Penal parashikon dënimin deri në 7 vite burg për armëmbajtje pa leje.
/vizionplus.tv
