Ministri i Financave deklaroi se vendi po kalon një moment të mirë ekonomik, duke treguar rezistencë në krahasim me vendet e tjera të rajoni.
Gjatë fjalës së tij në pritjen e organizuar nga Shoqata e Investitorëve të Huaj në Shqipëri, Mete theksoi se viti 2023 u shoqërua me disa zhvillime të rëndësishme e pozitive në aspektin ekonomik.
“Ne kemi patur një vit të mirë në 2023-shin. Po kalojmë një moment të mirë ekonomik, ndërkohë që ishim një nga ekonomitë më rezistente në rajon.
Kemi patur lajme të mira në fund të vitit: Kemi ulur borxhin në masë të konsiderueshme e jemi përmirësuar në vlerësimin e Standard & Poor’s, si edhe kemi dalë edhe nga lista gri”, tha ai.
Dalja nga lista gri e pastrimit të parave dhe rezistenca ekonomike, sipas ministrit të Financave ndihmuan klimën e biznesit, kryesisht në sektorin e turizmit.
“Të dyja këto kanë ndhmuar klimën e biznesit dhe projeksionet që ne kemi janë të forta për periudhën afatmesme duke u bazuar në sektorë si turizmi p.sh., të cilët kanë pasur një vit të mrekullueshëm vjet dhe ajo që pritet është që të ketë përmirësim edhe në 2024.
Sigurisht që do bëjmë më shumë kur bie fjala për produktivitetin, apo për një klimë më të mirë biznesi, po ashtu sic u theksua nga sondazhi juaj, ai për të cilin kemi folur para dy muajsh, pra kapitali njerëzor doli një nga ato fusha në të cilat ne duhet të përqendrohemi dhe do përqendrohemi”, tha ai.
Ministri Mete nënvizoi se në vazhdim fokusi do të jetë tek infrastruktura, por edhe në aspekte të produktivitetit, të cilat ndihmojnë klimën e biznesit.
“Besoj që ne kemi disa platforma shumë të mira ku ne shkëmbejmë ide, mendime, kemi Këshillin e Investimeve ku kemi pasur disa takime do thoja shumë frytdhënëse, kemi edhe Këshillin Ekonomik Kombëtar dhe shumë shpejt Ministria e Financave do rigjallërojë dhe Këshillin për taksat e tatimet, administratën tatimore, e cila është ndër ato fusha për të cilën ne mund të bashkëpunojmë më shumë”, përfundoi ai./vizionplus.tv/
