Juventusi e ka bërë prioritetin momental të tij transferimin e Edon Zhegrovës.
Mediat italiane shkruajnë se “Bianconeri” kanë arritur marrëveshje me futbollistin, përcjell “Gazeta Express”.
Mirëpo, për të arritur deri tek përfaqësuesi kosovar, Bardhezinjtë duhet t’i kalojnë dy pengesa.
I pari, siç raportojnë mediumet italiane “La Gazzetta dello Sport” dhe “Corriere dello Sport”, “Zonja e Vjetër” duhet ta shesë fillimisht Nico Gonzalez, i cili e ka zgjuar interesimin e Atletico Madridit.
Mediumet në fjalë raportojnë se Juve e vlerëson futbollistin ofanziv 25-30 milionë euro, por që “Los Colchoneros” do t’i paguanin më së shumti 15 milionë për argjentinasin.
Ish-futbollisti i Fiorentinës tashmë ka arritur marrëveshje me gjigantin e La Ligas, por po e pret dritën e gjelbër nga pajtueshmëria mes dy klubeve.
E njëjta gjë vlen edhe për Zhegrovën, i cili personalisht ka marrëveshje me Juven, por është duke e pritur marrëveshjen mes dy klubeve.
Kërkesa e Lillet është 20-25 milionë euro, por gjiganti italian është duke u munduar ta zbresë atë, posaçërisht për faktin se anësori ofanziv ka kontratë me klubin francez vetëm edhe një vit, deri në verën e vitit 2026.
Zhegrova e ka informuar kohë më parë klubin aktual se nuk do ta vazhdojë kontratën, kështu që Lille duhet ta shesë gjithsesi në këtë verë pasi në vitin tjetër mund ta humbasë lojtarin pa para.
Ndërkohë, interesim për Zhegrovën ka shfaqur edhe Olympique Marseille.
Juventusi duhet t’i kalojë dy pengesa për ta transferuar Zhegrovën / shkruan Gazeta Online Reporteri.net.
