Debati për ribalancin e Buxhetit vazhdon nesër në Komisionin amë për financim dhe buxhet.
Sot, në ditën e parë të debatit, deputetët e qeverisë dhe të opozitës akuzuan njëri-tjetrin se kush ka bërë më shumë ekonomikisht për vendin. Për deputetët e partisë në pushtet OBRM-PDUKM, ribalanci është real dhe garanton rritje ekonomike dhe përmirësim të standardit të jetesës, ndërsa për opozitën është provë se është bërë një llogaritje politike afatshkurtër dhe një sërë masash populiste.
Sipas deputetit Aleksandar Jamalov nga OBRM-PDUKM, ribalanci krijon mundësi ekonomike, kurse votimi për të është mbështetje për stabilitetin, zhvillimin dhe drejtësinë.
Jamalov theksoi se është përmirësuar pagesa, janë rritur të ardhurat tatimore, transfertat sociale, deficiti buxhetor është zvogëluar dhe gjithashtu ka pasur një rritje në shlyerjen e borxheve të vjetra.
“Ky ribalanc është provë se ne e dimë se ku po shkojmë. Votimi për ribalancin është mbështetje për stabilitetin, zhvillimin dhe drejtësinë”, tha Jamalov.
Deputeti Fatmir Bytiqi nga LSDM-ja, në përgjigje të Jamalovit, kujtoi se ribalanci po bëhet mbi një buxhet të krijuar nga qeveria aktuale dhe se kjo është provë se janë bërë parashikime të këqija.
“Është e pamohueshme që ribalanci i buxhetit do të votohet, por ju po harroni një ndryshim thelbësor – ky ribalanc i buxhetit është bërë në buxhetin tuaj, dhe përfundimi është se keni pasur parashikime të këqija më parë. Ju keni bërë një gabim, ky është realiteti. Nuk ka asnjë justifikim çfare ka qenë dhe si ka qenë, tashmë 365 ditë keni një Qeveri, është e jona t’ju kritikojmë, dhe është e juaja të mbroheni, por meqenëse tani nuk keni argumente, do të ktheheni në diçka që nuk është thelbësore për ribalancin e buxhetit”, tha Bytyqi.
Të ardhurat totale janë parashikuar në 362,4 miliardë denarë, ndërsa shpenzimet në 403,7 miliardë denarë, një për qind (rreth 3,5 miliardë denarë) më shumë se parashikimet fillestare në plan për këtë vit. Projeksioni i PBB-së mbetet në 3,7 për qind, ndërsa inflacioni është parashikuar në 2,8 për qind. Deficiti buxhetor mbetet i pandryshuar si në terma absolutë ashtu edhe si përqindje e PBB-së, pra 41,3 miliardë denarë ose 4 për qind e PBB-së. Shpenzimet kapitale, nga ana tjetër, arrijnë në 47,5 miliardë denarë. Sipas parashikimeve të Qeverisë, borxhi shtetëror në fund të vitit 2025 do të arrijë në 53,3 për qind të PBB-së, ndërsa borxhi publik pritet të jetë në nivelin e 62,1 për qind. Shkalla e papunësisë pritet të ulet në 11,1 për qind në vitin 2025, ndërsa shkalla e punësimit të arrijë në 47 për qind.
Për ribalancin janë dorëzuar mbi 200 amandamente, nga të cilat 160 janë janë nga LSDM-ja opozitare.
Debati për ribalancin e Buxhetit vazhdon nesër appeared first on Telegrafi.
