Ministri për Çështje Evropiane, Orhan Murtezani, në cilësinë e koordinatorit nacional për Instrumentin për Reforma dhe Rritje, mëngjesin e sotëm bashkëkryesoi me Takimin e Parë të Komitetit të Monitorimit për Instrumentin për Reforma dhe Rritje për Ballkanin Perëndimor (RGF), i cili sot u mbajt në format hibrid në ambientet e Qeverisë së Maqedonisë së Veriut.
Në takim Murtezani theksoi rëndësinë e kësaj platforme të re për përforcimin e procesit të reformave dhe bashkëpunimin ndërinstitucional duke i përshëndetur përfaqësuesit e Komisionit Evropian, institucionet financiare ndërkombëtare, sektorin civil si dhe përfaqësuesit e institucioneve nacionale të cilët ishin pjesmarrës në këtë takim.
“Murtezani u shpreh se Plani për Rritje dhe Agjenda reformuese janë të dizajnuara për të sjellë reforma kyçe socio-ekonomike dhe për t’i nxitur vlerat demokratike dhe sundimin e ligjit, të cilat janë parakusht për stabilitet, prosperitet dhe integrim në Bashkimin Evropian. Në kuadër të takimit, anëtarët e Komitetit diskutuan për progresin në inplementimin e Instrumentit për Reforma dhe Rritje, duke u përqendruar në përmbushjen e kushteve të përgjithshme për mbështetje, hapat kyç të arritura dhe rezultatet e vlerësimit të Komisionit Evropian për serinë e parë të detyrimeve. U shkëmbyen mendime për mekanizmat e monitorimit, gjithëpërfshirjen e procesit përmes kyçjes së shoqërisë civile, si dhe çështjet horizontale lidhur me burimet njerëzore, transparencën në buxhetim dhe menaxhimin me reforma, si dhe harmonizimin me legjislacionin evropian.
Maqedonia e Veriut mbetet plotësisht e përqëndruar në implementimin e Agjendës reformuese, e cila përfshin fusha prioritare si qeverisje të mirë, financa publike, tranzicionin energjetik dhe të gjelbër, zhvillimin e kapitalit njerëzor, klimën e biznesit dhe sundimin e ligjit. Si tregues i qartë i pjekurisë politike dhe kapacitetit institucional të vendit që të ecë drejt standardeve evropiane përmes reformave thelbësore, Maqedonia e Veriut në kohë rekorde të shkurtër i finalizoi të gjitha procedurat ligjore, që mundësoi tërheqjen në kohë të parafinancimit prej 52.5 milionë euro”, thuhet në njoftimin e Ministrisë për Çështje Evropiane.
Murtezani gjithashtu njoftoi se tanimë është iniciuar procedura e parë për pagesën e këstit të ri prej 17 milionë euro, ku një pjesë e konsiderueshme janë të dedikuara për investime kapitale./Telegrafi/
Murtezani: Me rritjen dhe agjendën reformuese synohen reforma kyçe socio-ekonomike appeared first on Telegrafi.