Kim Kardashian, themeluesja e markës SKIMS dhe një nga emrat më të njohur në industrinë e modës dhe televizionit, shpenzon më shumë se një milion dollarë çdo vit për një ekip prej dhjetë dadosh që kujdesen për fëmijët e saj.
Një burim për The U.S. Sun ka zbuluar së fundmi se Kardashian, e cila ka katër fëmijë me ish-bashkëshortin Kanye West – North (11 vjeçe), Saint (nëntë vjeç), Chicago (shtatë vjeçe) dhe Psalm (gjashtë vjeç) – ka krijuar një sistem shumë të rreptë për kujdesin ndaj fëmijëve. Çdo fëmijë ka një dado të dedikuar, e ndonjëherë edhe më shumë se një.
Për shkak të angazhimeve të saj të shumta në biznes, Kim ka staf të angazhuar shtatë ditë në javë, përfshirë edhe dado që punojnë natën për të siguruar që çdo gjë të jetë gati për mëngjesin e ditës tjetër. Sipas burimit, dadot e ditës nisin punën që në orën 6:00 të mëngjesit dhe punojnë në turne 12-orëshe, me një pagesë vjetore prej 100 mijë dollarësh (87,500 euro). Ato kanë një ditë pushim në javë dhe duhet të udhëtojnë gjithmonë me fëmijën për të cilin janë përgjegjëse.
Dadot gjithashtu i shoqërojnë fëmijët edhe në vizitat tek babai i tyre, Kanye West. “Kur një nga fëmijët, për shembull North, shkon te Kanye, zakonisht krijohet pak kaos sepse Kim ka rreth tre dado të besuara që i dërgon. Kur shkojnë dy fëmijë njëkohësisht, situata bëhet edhe më e ndërlikuar – ndaj dhe ajo ka krijuar një ekip prej rreth 10 dadosh”, ka treguar burimi.
Por kjo nuk është e gjitha – përveç dadove, fëmijët kanë edhe mësues privatë, mësues arti, kërcimi dhe muzike, stilistë personalë dhe udhëheqës të aktiviteteve kreative. E gjithë kjo ushtri profesionistësh është e përkushtuar ndaj mirëqenies së fëmijëve dhe vepron në një krah të veçantë të shtëpisë së Kardashian, që është përshtatur posaçërisht për ta.
Secila dado ka rol të caktuar dhe, sipas burimit, dadoja e North-it është gjithashtu mësuese dhe asistente personale për të.
Sipas The U.S. Sun, dadot kujdesen për gjithçka – nga ushqimi, veshjet dhe rrobat e larjes, deri te siguria, shoferët dhe organizimi i axhendës së secilit fëmijë. Ato përfitojnë edhe rritje page nëse fëmijët i pëlqejnë dhe kanë qëndruar në punë për më shumë se 18 muaj.
Zbulohet shuma e madhe me të cilën Kim Kardashian i paguan 10 dadot e saj / shkruan Gazeta Online Reporteri.net.
