Milani është në kërkim të një drejtori të ri sportiv dhe pas takimit të gjatë të së martës në Romë, Igli Tare është më afër se kurrë për të marrë këtë rol kyç në strukturën kuqezi.
Takimi “kokë më kokë” mes CEO-së së Milanit, Giorgio Furlani, dhe ish-drejtorit të Lazios, zgjati gati gjashtë orë dhe u parapri nga disa kontakte telefonike në ditët e fundit.
Megjithëse ende nuk është arritur një marrëveshje përfundimtare, bisedimet konsiderohen pozitive dhe kanë vendosur Taren në pozicionin kryesor për të marrë drejtimin sportiv të klubit.
Ai gëzon mbështetjen e Zlatan Ibrahimovic, si dhe ka një marrëdhënie të mirë me drejtorin teknik kuqezi, Geoffrey Moncada.
Tare, i lirë nga çdo kontratë që prej largimit nga Lazio në verën e vitit 2023, përfaqëson një alternativë të menjëhershme dhe me eksperiencë për Milanin.
Në kontrast me kandidatë të tjerë si D’Amico (i lidhur me Atalantën deri në vitin 2027), ai është i gatshëm të nisë menjëherë punën për sezonin e ardhshëm.
Me më shumë se një dekadë eksperiencë në Serie A dhe njohuri të thella në merkato si brenda ashtu edhe jashtë Italisë, Tare shihet si një figurë strategjike për ringritjen e Milanit.
Gjatë takimit në Romë janë diskutuar gjithashtu tema kyçe si strategjia e merkatos, përforcimet për sezonin e ri dhe mbi të gjitha – emri i trajnerit që do të udhëheqë skuadrën, shkruan tch.
Edhe pse e ardhmja e Conceiçao duket e vendosur, pavarësisht rezultateve në Kupën e Italisë, Tare ka bërë të qartë idenë e tij: ai do të sillte me vete Massimiliano Allegrin.
Ish-trajneri i Milanit, i cili fitoi një Scudetto dhe një Superkupë me klubin në periudhën 2010–2014, është një nga emrat më të pëlqyer nga Tare.
Kandidatë të tjerë për stolin kuqezi janë Antonio Conte (Napoli), Roberto De Zerbi (Marseille) dhe Cesc Fabregas (Como).
Megjithëse takimi ishte një hap i madh përpara, pritet të ketë edhe takime të tjera për të përmbyllur procesin.
Milani kërkon të mbyllë sa më shpejt këtë kapitull për të nisur ndërtimin e projektit të ri sportiv.
Igli Tare nuk shkon i vetëm te Milani, pritet ta marrë me vete edhe ish-trajnerin e Juventusit / shkruan Gazeta Online Reporteri.net.
