Aleanca për Shqiptarët – krahu i Ziadin Selës ka reaguar ndaj vendimeve të fundit mbi Qendrën Klinike Universitare në Shkup, pasi ministri i Shëndetësisë, Arben Taravari tha se parkingu i kësaj qendre do të menaxhohet nga një kompani private.
Nga ASH-Sela thonë se menaxhimi i parkingut duhet t’i mbetet Qendrës Klinike Universitare, pasi ashtu siç ka vendosur ministria, ka hapësira për keqpërdorim.
Reagimi i plotë:
Parkingu i Qendrës Klinike Universitare duhet të menaxhohet nga vetë institucioni
Në një shtet social, shëndetësia publike duhet të jetë shtylla kryesore e shërbimeve shëndetësore dhe një institucion jofitimprurës. Megjithatë, vendimi i Ministrisë së Shëndetësisë për t’ia dhënë menaxhimin e parkingut të Qendrës Klinike Universitare një kompanie private anonime ngjall dyshime për mundësi abuzimi dhe keqpërdorimi.
Në të kaluarën, parkingu është menaxhuar nga vetë Qendra Klinike Universitare, një praktikë që ka qenë më logjike dhe më e dobishme si për institucionin, ashtu edhe për punonjësit dhe qytetarët që përdorin shërbimet shëndetësore për vete apo të afërmit e tyre.
Përparësitë e vetëmenaxhimit të parkingut nga Qendrës Klinike Universitare:
Transparencë dhe menaxhim efektiv – Qendra Klinike Universitare do të kishte kontroll të plotë mbi të ardhurat dhe shpenzimet e parkingut, duke shmangur ndërmjetësit privatë dhe rreziqet e keqpërdorimeve.
Prioritet për stafin dhe pacientët – Një menaxhim i brendshëm mund të sigurojë që personeli shëndetësor dhe pacientët të kenë qasje të garantuar në hapësirat e parkimit.
Të ardhura për spitalin – Fitimet nga parkingu mund të investohen drejtpërdrejt në përmirësimin e shërbimeve shëndetësore dhe mirëmbajtjen e infrastrukturës.
Zbutja e kaosit – Një sistem i organizuar nga vetë Qendra Klinike Universitare mund të zvogëlojë trafikun dhe bllokimet brenda oborrit të spitalit.
Shmangia e abuzimeve – Përvoja ka treguar se kur parkingjet menaxhohen nga kompani private, shpesh ka rritje të tarifave dhe keqmenaxhim. Duke e mbajtur atë nën administrimin e Qendrës Klinike Universitare, mund të sigurohet që çmimet të mbeten të arsyeshme dhe në funksion të qytetarëve.
Për këto arsye Aleanca për Shqiptarët kërkon që menaxhimi i parkingut duhet t’i mbetet Qendrës Klinike Universitare, si një mënyrë më e drejtë dhe më efikase për të mbrojtur interesin publik.
ASH-Sela: Parkingu i Qendrës Klinike Universitare duhet të menaxhohet nga vetë institucioni, jo nga kompani private appeared first on Telegrafi.
