Procedura për plasimin e 250 milionë eurove nga huaja hungareze për kompanitë u mbyll me sukses. Marrëveshjet që i miratoi Qeveria në seancën e fundit të qeverisë tashmë janë nënshkruar nga Ministria e Financave dhe Banka Zhvillimore e Maqedonisë së Veriut, ndërsa është në zhvillim e sipër procedura për nënshkrimin e marrëveshjeve të Bankës Zhvillimore me bankat afariste përmes të cilave do të plasohen mjetet ndaj shfrytëzuesve të fundit, përkatësisht kompanive, kumtoi sot Ministria e Financave.
Bëhet fjalë për 250 milionë euro që i siguroi Qeveria për ta përkrahur sektorin privat, të cilat do t’u plasohen shfrytëzuesve të fundit me kushte jashtëzakonisht të favorshme. Përkatësisht me periudhë shlyerjeje deri në 15 vjet, duke përfshirë periudhën grejs deri në 3 vjet, interesi do të jetë vetëm 1.95% dhe pa kompensim aprovimi dhe menaxhimi.
Mjetet, sipas kushteve të aprovuara nga Qeveria dhe marrëveshjet e nënshkruara, mund të shfrytëzohen si mjete fikse nga të gjitha kompanitë në të gjithë sektorët, me përjashtim të sektorit të prodhimtarisë ose tregtisë së pijeve alkoolike, përveç birrës dhe verës, prodhimtarisë ose tregtisë së duhanit, si dhe aktivitetet që lidhen me lojërat e fatit, kazinotë dhe ndërmarrjet ekuivalente. Gjithashtu, mjetet nuk do të mund të shfrytëzohen për rifinancimin e huave paraprake.
“Me këtë fillon cikli i investimeve në sektorin privat prej mbi 250 milionë euro, duke marrë parasysh që shfrytëzuesit e kredisë duhet të jenë pjesëmarrës me 20% të mjeteve vetanake në realizimin e investimit. Mjetet do të aprovohen dhe paguhen nga bankat në bazë të dokumentacionit të dorëzuar, në procedurë transparente, e cila do të mundësojë edhe kontrollin e duhur të shfrytëzimit të mjeteve. Qëllimi i Qeverisë me këtë masë është përkrahja e sa më shumë investimeve që do të kontribuojnë në përshpejtimin e rritjes ekonomike”, njofton Ministria e Financave.
Mjetet e dedikuara për kompanitë janë pjesë e linjës kreditore hungareze, që Qeveria e merr nga Hungaria, për çka marrëveshja u nënshkrua më 8 tetor në Budapest.
Ministria e Financave e RMV-së dhe Banka Zhvillimore nënshkruan kontratë për plasimin e 250 milionë eurove për sektorin privat appeared first on Telegrafi.