Sekretari amerikan i Shtetit Anthony Blinken u zotua sot se do të ruajë mbështetjen e SHBA për Ukrainën, pas një takimi në Davos me Presidentin Volodymyr Zelensky.
“Ne jemi të vendosur të ruajmë mbështetjen tonë për Ukrainën dhe po punojmë shumë ngushtë me Kongresin për këtë çështje. Unë e di se kolegët tanë evropianë do të bëjnë të njëjtën gjë”, tha Blinken.
Këshilltari për sigurinë kombëtare të Shtëpisë së Bardhë, Jake Sullivan, i cili ishte gjithashtu i pranishëm, siguroi presidentin ukrainas se Shtetet e Bashkuara dhe aleatët e saj janë të vendosur të “sigurojnë që Rusia të dështojë dhe Ukraina të fitojë”.
Zelensky falënderoi administratën Biden dhe mbështetjen dypartiake në Kongresin Amerikan.
Ai përmendi kryesisht sistemin amerikan Patriot, i cili ndihmoi Ukrainën në mbrojtjen e saj ajrore kundër sulmeve raketore ruse.
Që nga fillimi i pushtimit rus të Ukrainës në shkurt 2022, Shtetet e Bashkuara kanë dërguar rreth 44 miliardë dollarë ndihmë ushtarake në Ukrainë, plus shumë miliarda ndihmë dhe mbështetje ekonomike.
Administrata e Biden publikoi paketën e saj të fundit të ndihmës në fund të dhjetorit, por republikanët po e kushtëzojnë mbështetjen e tyre për një paketë të re me një shtrëngim drastik të politikës amerikane të imigracionit.
Disa prej tyre, veçanërisht ish-presidenti Donald Trump, i cili shihet si favorit në kampin e tij në fushatën e nominimit presidencial, shprehin rezerva për këtë ndihmë dhe shanset për një fitore të Ukrainës. /vizionplus.tv
