Qeveria amerikane tha të martën se ishte koha për të finalizuar një marrëveshje për të shpallur armëpushim në Rripin e Gazës, por kryeministri izraelit vazhdoi të sfidonte presionin mbi këtë çështje.
Pozicioni i Uashingtonit u regjistrua dy ditë pasi ushtria izraelite njoftoi se kishte gjetur në një tunel nëntokësor në Rripin e Gazës trupat e gjashtë pengjeve të cilët ishin ekzekutuar, sipas tij, nga anëtarë të krahut ushtarak të Hamasit.
Pengjet ishin rrëmbyer dhe dërguar në Rripin e Gazës gjatë sulmit të paprecedentë të Hamasit në Izraelin jugor më 7 tetor, duke shkaktuar një operacion ushtarak në shkallë të gjerë si hakmarrje që la dhjetëra mijëra të vdekur dhe shkatërrim të gjerë në enklavën, ku bombardimet vazhduan dje.
Zbulimi dhe gjetja e gjashtë trupave rriti presionin mbi Netanyahu, duke shkaktuar protesta nga mijëra izraelitë në Tel Aviv dhe Jerusalem, si dhe aksione grevë, me një kërkesë qendrore për një marrëveshje për kthimin e pengjeve të mbetura në Gaza.
“Ka dhjetëra pengje në Gaza, të cilët janë ende në pritje të një marrëveshjeje që do t’i lejojë ata të kthehen në shtëpi. Është koha për të finalizuar këtë marrëveshje”, u tha dje gazetarëve të akredituar zëdhënësi i Departamentit të Shtetit, Mattheë Miller.
Ai shtoi se në ditët në vijim, SHBA do të vazhdojë të bisedojë me partnerët në rajon për të siguruar një marrëveshje përfundimtare, duke iu referuar negociatave indirekte të ndërmjetësuara nga Katari, Egjipti dhe Uashingtoni për të shpallur një armëpushim, i cili do të shoqërohet me lirimin e pengjeve izraelite në Rripin e Gazës në këmbim të lirimit të palestinezëve të mbajtur në qendrat e paraburgimit izraelit.
Presidenti i SHBA Joe Biden, vendi i të cilit është aleati kryesor i Izraelit, qortoi kryeministrin izraelit Netanyahu se nuk bëri mjaftueshëm për të siguruar një marrëveshje./vizionplus.tv
