Bashkimi Europian do të nisë këtë javë bisedimet për krijimin e një misioni special sigurie, si një masë e marrë për t’u përballur me rrezikun e grupi Houthi në Detin e Kuq.
Diskutimet do të fillojnë në bazë të një propozimi që do të paraqitet nga Shërbimi Evropian i Veprimit të Jashtëm dhe Përfaqësuesi i Lartë i BE-së, Josep Borrell , siç njoftoi vetë ky i fundit javën e kaluar nga Lisbona.
Ndërkohë, Peter Stano sqaroi se ky mision i ri i BE-së në Detin e Kuq do të jetë një proces krejtësisht i ri dhe nuk do të bazohet në operacionin tashmë ekzistues detar evropian “ATALANTA” i cili u krijua vite më parë për sigurinë në Detin e Kuq dhe në perëndim të Oqeanit Indian, i cili kishte për qëllim të luftonte piraterinë në brigjet e Somalisë.
“Këtë javë nis procesi i koordinimit dhe diskutimet me shtetet anëtare për misionin e ri të shpallur nga Përfaqësuesi i Lartë i BE-së, jemi në fillim të procesit. Në fund i takon shteteve anëtare të bien dakord se cila do të jetë forma, mandati dhe mjetet e një misioni të tillë”, tha përfaqësuesi i Komisionit. “Është e qartë se BE-ja ka një interes për të rivendosur sigurinë e lundrimit dhe sigurinë detare në rajonin e Detit të Kuq, i cili është një zonë shumë e rëndësishme për tregtinë ”, shtoi ai.
Lidhur me veprimet e Iranit në rajon , Peter Stano theksoi se Përfaqësuesi i Lartë i BE-së si dhe disa ministra të jashtëm të BE-së i kanë dërguar mesazhe të forta Iranit për rrezikun e përshkallëzimit rajonal në Lindjen e Mesme dhe Detin e Kuq.
“Mesazhi është shumë i qartë nga BE. Ne duhet të bëjmë gjithçka për të parandaluar përshkallëzimin e mëtejshëm. Veprimet e Houthis duhet të ndalen menjëherë. Për këtë duhet të kontribuojnë të gjithë ata që kanë çfarëdo lloj ndikimi te Houthis ”, tha përfaqësuesi i Komisionit./vizionplus.tv/
