Dukagjin Lipa, babai i këngëtares me famë botërore, Dua Lipa, në një intervistë për revistën IQ ka folur për organizimin e festivalit “Sunny Hill”, në Kosovë. Lipa ka thënë se me listën e këngëtarëve që kanë sjellë këtë vit në Kosovë, “Sunny Hill” i konkurron edhe disa prej festivaleve më kryesore në Evropë.
“Me këtë formacion mendoj se po konkurrojmë me disa nga festivalet më të mëdha në Evropë. Jemi shumë krenarë për këtë”, thotë Dukagjin Lipa për IQ, duke pasur parasysh se në Prishtinë këtë vit kanë performuar Bebe Rexha, Stormzy, Burna Boy, The Blaze, DJ Snake, Black Coffee, The Martinez Brothers dhe Groove Armada.
Siç shkruan revista IQ, edicioni i sivjetmë i festivalit që u zhvillua në një lokacion të ri, ka tërhequr 35 mijë njerëz çdo ditë dhe ka vendosur një rekord të ri të pjesëmarrjes në Kosovë.
“Kapaciteti i faqes së re është i madh, kështu që ne jemi të përgatitur për vitet në vijim.Ne shpresojmë që vitin e ardhshëm do të kemi 40,000 njerëz dhe do ta rrisim atë për pesë deri në 10 vitet e ardhshme derisa të arrijmë kapacitetin e plotë prej 90,000 të lokacionit.”, ka thënë Lipa.
Dukagjin Lipa ka thënë gjithashtu se festivali “Sunny Hill” po ndihmon edhe për të ndryshuar retorikën për Kosovën, si një vend të shkatërruar nga lufta.
“Sunny Hill po ndihmon për të ndryshuar retorikën për Kosovën si një vend të shkatërruar nga lufta dhe po e tregon atë në një këndvështrim tjetër”, ka thënë Dukagjin Lipa.
Në këtë intervistë për IQ, Dukagjin Lipa ka treguar se ka qenë e vështirë për t’i bindur artstët e kalibrit botëror për të performuar në Kosovë, meqë s’e dinin se çfarë i priste.
“Por vizitorët ndërkombëtarë janë befasuar shumë këndshëm – Kosova është ndoshta vendi më përparimtar në Ballkan dhe rinia në këtë vend është shumë e lezetshme dhe e informuar”, ka thënë Lipa./Express
Dukagjin Lipa: Vizitorët e huaj janë befasuar me Sunny Hill, Kosova është ndoshta vendi më përparimtar në Ballkan / shkruan Gazeta Online Reporteri.net.
