Bashkimi Evropian ka thënë se është i gatshëm të përfshihet në bisedime me presidentin e porsazgjedhur të Iranit, Masud Pezeshkianin.
Pezeshkian, ligjvënësi reformist, e fitoi balotazhin presidencial të Iranit më 5 korrik, duke u bërë presidenti i nëntë i Republikës Islamike të Iranit.
“Ne jemi në dijeni për rezultatin e zgjedhjeve presidenciale në Iran dhe e urojmë presidentin e zgjedhur Masud Pezeshkian”, tha Nabila Massrali, zëdhënësja e BE-së për politikë të jashtme dhe siguri, në një postim në X.
“Ne jemi të gatshëm të angazhohemi me Qeverinë e re në përputhje me politikën e BE-së për angazhim kritik”, shkroi ajo.
Pezeshkian ka bërë thirrje për “marrëdhënie konstruktive” me vendet e Perëndimit dhe e mbështet ringjalljen e marrëveshjes bërthamore të vitit 2015 mes Iranit dhe fuqive globale.
Pas marrëveshjes bërthamore të vitit 2015, SHBA-ja i hoqi sanksionet kundër Iranit, por më 2018, presidenti i atëhershëm amerikan, Donald Trump, u tërhoq nga marrëveshja dhe prej atëherë Uashingtoni ka rikthyer sanksionet që e kanë ngufatur ekonominë e republikës islamike.
Përpjekjet për ringjalljen e marrëveshjes kanë dështuar dhe Teherani ka shkelur kushtet e marrëveshjes duke prodhuar uranium të shkallës së lartë të pasurimit.
Në mars, Bloomberg News citoi një zyrtar të lartë të Departamentit amerikan të Mbrojtjes duke thënë se Irani ishte më pak se 12 ditë larg që të posedonte materiale të nevojshme për prodhimin e një bombe bërthamore./rel
