367 pasagjerë dhe 12 anëtarë të ekuipazhit të avionit “Japan Airlines” përjetuan jo pak momente paniku dhe frike, kur avioni me të cilin ata po udhëtonin u përplas me një avion tjetër që do shpërndante ndihmat për personat e prekur nga tërmeti.
Por si ja dolën të shpëtonin të gjithë personat që ishin në bordin e ‘Japan Airlines’?!
Pasagjerët iu drejtuan menjëherë daljeve emergjente të avionit të djegur të “Japan Airlines” pa bagazhet e tyre të dorës, në përputhje me udhëzimet e ekuipazhit të fluturimit.
Lënia pas e sendeve të tyre me vlerë për të shpëtuar jetën ishte një “faktor kryesor” pas evakuimit të shpejtë të të gjithë 379 personave në bord, pikërisht përpara se avioni të përfshihej nga flakët në pistën e aeroportit Haneda në Tokio të martën e kaluar, thonë ekspertët e aviacionit.
Ekspertët e aviacionit dhe ekuipazhi i fluturimit thonë se ekuipazhi i fluturimit vendosi në punë trajnimin e tyre rigoroz dhe pasagjerët u treguan “të sjellshëm” që iu bindën protokolleve të sigurisë.
“Unë nuk shoh asnjë pasagjer të vetëm në tokë, në asnjë nga videot që kam parë, që të ketë bagazhet e tyre me vete… Nëse njerëzit do të përpiqeshin të merrnin bagazhet e tyre të kabinës, kjo është vërtet e rrezikshme sepse ata do të ngadalësonin evakuimin”, tha Prof Ed Galea, drejtor i Grupit Inxhinierik të Sigurisë nga Zjarri në Universitetin e Greenëich.
Një pasagjer pësoi mavijosje dhe 13 të tjerë kërkuan konsulta mjekësore për shkak të shqetësimit fizik, tha linja ajrore.
Trajnimi për sigurinë
Një ish-stjuardesë e “Japan Airlines” i tha BBC-së se pasagjerët në fluturimin komercial ishin “jashtëzakonisht me fat”.
“U ndjeva e lehtësuar kur zbulova se të gjithë pasagjerët ishin të sigurt. Por kur fillova të mendoj për procedurën e evakuimit emergjent, papritmas u ndjeva nervoze dhe e frikësuar,” tha ajo. “Në varësi të mënyrës se si u përplasën dy avionët dhe si u përhap zjarri, mund të kishte qenë shumë më keq”.
Në situatat e jetës reale, mund të jetë e vështirë të sigurohet që pasagjerët të mos kenë panik, tha ish-stjuardesa, e cila foli në kushte anonimiteti.
“Por ajo që ata arritën është më e vështirë nga sa mund të imagjinohet. Fakti që ata arritën t’i bënin të gjithë të arratiseshin është rezultat i një koordinimi të mirë midis ekuipazhit dhe pasagjerëve duke ndjekur udhëzimet”– tha ajo.
Ish-stjuardesa tha se anëtarët e rinj të ekuipazhit i nënshtrohen trajnimit të rreptë të evakuimit dhe shpëtimit deri në tre javë përpara se të lejohen të shërbejnë në fluturime komerciale. Trajnimi përsëritet çdo vit.
“Ne kalojmë një provim me shkrim, diskutime studimi rasti dhe trajnime praktike duke përdorur skenarë të ndryshëm, si për shembull kur avioni duhet të bëjë një ulje në ujë ose nëse ka zjarr në bord. Stafi i mirëmbajtjes është gjithashtu i përfshirë në një trajnim të tillë,” tha ish- stjuardesa, e cila u largua nga kompania 10 vjet më parë.
Një pilot i një linje ajrore të Azisë Juglindore, i cili gjithashtu foli në kushte anonimiteti, tha se trajnimi rigoroz që i ishte nënshtruar ekuipazhit të fluturimit ndihmoi në evakuimin e shpejtë.
Në vitin 2006, “Japan Airlines” hapi një objekt të ngjashëm me muzeun pranë Haneda-s, duke shfaqur rrënojat nga incidenti, me qëllim promovimin e ndërgjegjësimit për sigurinë midis punonjësve të saj.
“Përballë dhimbjes dhe pikëllimit të familjeve të ndjera dhe mosbesimit të publikut në sigurinë e linjës ajrore [pas rrëzimit të 1985], ne u zotuam se nuk do të lejonim më kurrë të ndodhte një aksident i tillë tragjik”, shkroi “Japan Airlines” në faqen e internetit të objektit./vizionplus.tv
