Prej vitesh, dilema nëse është më higjienike të bësh dush në mëngjes apo në mbrëmje ka qenë temë diskutimi, me secilën palë që mbështet preferencat e veta.
Disa e shohin dushin e mbrëmjes si mënyrë për t’u relaksuar dhe për të kursyer kohë në mëngjes, ndërsa të tjerë preferojnë të pastrohen në fillim të ditës për t’u ndier të freskët dhe energjikë.
Por, sipas Dr. Primrose Freestone, pedagoge e lartë në mikrobiologji klinike, njëra nga këto praktika ka avantazh të qartë. Në një opinion për The Conversation, ajo thotë se, nga këndvështrimi i shëndetit dhe higjienës, është më mirë të bëni dush në mëngjes.
“Si mikrobiologe, e mbështes dushin në mëngjes. Në këtë mënyrë, trupi është më i pastër nga mikrobet që grumbullohen gjatë natës, përpara se të vishen rrobat e ditës,” thekson Dr. Freestone.
Sipas saj, gjatë ditës, trupi ekspozohet ndaj një sërë ndotësish dhe bakteresh, të cilat mbeten në rrobat që veshim dhe më pas transferohen në çarçafët tanë gjatë natës. Kjo bën që edhe nëse pastrohemi në mbrëmje, lëkura e pastër bie në kontakt me shtretër potencialisht të kontaminuar.
Ajo shton se, përveç ndotësve të jashtëm, gjatë gjumit trupi djersit dhe lëshon qeliza të vdekura të lëkurës – një burim ushqimi për marimangat e pluhurit, të cilat mund të shkaktojnë alergji te disa persona. Kjo është një arsye tjetër që e bën dushin në mëngjes më të favorshëm për shëndetin e lëkurës.
Pavarësisht kohës kur bëni dush, Dr. Freestone nënvizon se një rutinë e qëndrueshme higjiene është thelbësore. Nëse nuk keni mundësi të bëni dush në mëngjes, ajo rekomandon kujdes të shtuar për pastërtinë e mjedisit të gjumit.
“Rekomandohet që çarçafët dhe jastëkët të lahen të paktën një herë në javë, për të eliminuar djersën, bakteret, qelizat e vdekura dhe yndyrnat e lëkurës që mblidhen me kalimin e ditëve,” thotë ajo.
Kjo ndihmon edhe në reduktimin e sporeve të kërpudhave dhe mikrobeve që mund të shkaktojnë erë të keqe në dhomën e gjumit.
Ndërkohë, dermatologët këshillojnë që të shmanget përdorimi i sapunëve të zakonshëm, të cilët mund të dëmtojnë shtresën mbrojtëse të lëkurës. Ata rekomandojnë përdorimin e pastruesve të butë dhe të formuluar posaçërisht për të ruajtur shëndetin dhe balancën natyrale të lëkurës.
Kur është më mirë të bëni dush – në mëngjes apo në mbrëmje? / shkruan Gazeta Online Reporteri.net.
