Duhanpirësit po paralajmërohen të heqin dorë nga zakoni i tyre në vitin e ri, sepse hulumtimi i fundit ka treguar se meshkujt humbasin 17 minuta nga jeta e tyre me çdo cigare që pinë, ndërsa jeta e grave shkurtohet me 22 minuta.
Kjo është më shumë se sa vlerësimet e mëparshme sugjerojnë se çdo cigare shkurton jetën e një duhanpirësi me 11 minuta. Vlerësimet e ekspertëve, të cilat tregojnë se çdo cigare sjell mesatarisht 20 minuta humbje jete për të dyja gjinitë, bazohen në shifrat më të fundit të studimeve afatgjata që monitorojnë shëndetin e popullatës, shkruan skynews.
Studiuesit nga Kolegji Universitar i Londrës thanë se dëmi i shkaktuar nga pirja e duhanit është “kumulativ” dhe sa më shpejt që një person të lërë duhanin dhe sa më shumë të shmangë cigaret, aq më gjatë jeton.
Analiza e re, e porositur nga Departamenti Britanik i Shëndetësisë dhe Mirëqenies, sugjeron se nëse një duhanpirës që pi 10 cigare në ditë e lë duhanin më 1 janar, deri më 8 janar ai mund të “parandalojë humbjen e një dite të tërë të jetës”.
Deri më 20 shkurt, jeta e tyre mund të zgjatet me një javë të tërë dhe nëse e lënë duhanin deri më 5 gusht, ata ndoshta do të jetojnë një muaj të tërë më shumë sesa nëse do të kishin vazhduar me vesin e keq.
Autorët shtuan se “kërkimet sugjerojnë se duhanpirësit zakonisht humbasin pothuajse të njëjtin numër vitesh të shëndetshme si vitet e jetës së tyre totale. Kështu, një duhanpirës 60-vjeçar zakonisht do të ketë profilin shëndetësor të një 70-vjeçari jo duhanpirës”.
Analiza, që do të botohet në Journal of Addiction, përfundon se “ne vlerësojmë se, mesatarisht, duhanpirësit në Britani që nuk e lënë duhanin humbasin afërsisht 20 minuta jetëgjatësi për çdo cigare që pinë”.
Ekspertët thonë se lënia e duhanit në çdo moshë është e dobishme, por “sa më shpejt duhanpirësit të zbresin nga kjo shkallë e vdekjes, ata mund të presin një jetë më të gjatë dhe më të shëndetshme”.
Hulumtimi i ri: Pirja e një cigareje të vetme mund të shkurtojë deri në 20 minuta të jetës suaj / shkruan Gazeta Online Reporteri.net.
