Linda Pano bashkëshortja e Pastorit Akil Pano, ka rrëfyer disa eksperienca personale të cilat sipas saj tregojnë se ka jetë pas vdekjes.
E ftuar në “Vizioni i Pasdites” të moderatores Brikena Prifti në Vizion Plus, Linda Pano ka treguar se disa vite më parë bashkë me bashkëshortin e saj Akil Pano udhëtuan drejt Arkansas, për të vizituar djalin e miqve të tyre i cili kishte rënë në koma pas një aksidenti me motor.
Linda rrëfen se ata nuk kishin asnjë gjë në dorë për të rikthyer në jetë djalin e miqve të tyre dhe se e vetmja gjë që mund të bënin ishte të luteshin dhe të shpresonin.
Sipas saj pak ditë pasi ajo dhe Akil Pani ishin rikthyer në Tiranë, djali del nga koma dhe kishte pyetur babain e tij nëse gjatë kësaj kohe kishin vizituar Shqipërinë, pasi kishte dëgjuar gjatë gjithë kohës të flitej shqip.
Për neurokirurgun Kita Sallabanda kjo ka një shpjegim shkencor, e cila tregon se ai djalë i ka dëgjuar dhe në brendësi e ka parë atë çfarë ka ndodhur.
Sipas tij mjekët në shumë raste këshillojnë të afërmit e pacientëve që janë në koma që tu vënë kufje me muzikë klasike, dhe kur ata zgjohen tregojnë eksperiencat e tyre dhe mbajnë mend muzikën klasike.
Pjesë nga biseda:
Linda Pano: Ju referuam Platonit dhe Sokratit dhe ata kanë thënë se ka jetë pas vdekjes dhe shpirti nuk mund të vdesë. Ata nuk flasin për fenë aty. Dua të përmend një rast në Arkansa kur ishim te disa miq, djali i tyre kishte bërë aksident dhe ishte në koma. Kur shkuam t’i takojmë familja ishte e shokuar, pasi mendonin se djali do të ndërrojë jetë, dhe ju thamë se ajo që mund të bëjmë ne është të lutemi. Djali doli në koma disa ditë pasi ikëm ne dhe kishte thënë: Ba kemi qenë në Shqipëri.
Kita Sallabanda: Kjo është një histori shumë e bukur dhe shumë e vërtetë. Ne të sëmurëve që janë në koma ju këshillojmë të afërmve tu vënë kufje me muzikë klasike. Pra ai djalë ju ka dëgjuar, dhe ai në brendësi të tij e ka parë këtë si fenomen. Nga ana shkencore është shumë e saktë. Kam një rast tjetër një i afërm i gruas time ra në koma dhe më thanë çfarë ti bëjmë, ju thashë vini kufje me muzikë klasike, dhe ky person një muaj pasi doli nga koma kujtonte vetëm muzikën klasike.
Linda Pano: Ka qenë rasti i një gruaje në Virxhinia e cila ka qenë e vdekur për 17 orë, pasi ju bë gjithçka nga ana mjekësore, të birit ju tha që tani duhet të heqim asistencën. Në kohën që doktorët po bëheshin gati t’i merrnin organet ajo zgjohet. Për doktorët kjo është mrekulli dhe ka një shpjegim.
Kita Sallabanda: Ka një shpjegim, që tregoi se aktiviteti i trurit nuk ishte zhdukur.
