Ministri i Punëve të Brendshme Pançe Toshkovski, në kuadër të vizitës së tij në Emiratet e Bashkuara Arabe, mori pjesë në Forumin Botëror të Policisë – platformë globale për bashkëpunim në fushën e sigurisë, inovacione teknologjike dhe të ardhmen e policisë, e cila bashkon udhëheqës dhe ekspertë të policisë nga mbi 100 vende.
Në fjalimin e tij në samit, Toshkovski shqyrtoi rolin e Maqedonisë së Veriut si vend me pozicion strategjik në Ballkan, i vogël në madhësi, por i madh në rëndësi kur bëhet fjalë për stabilitetin rajonal dhe sigurinë evropiane.
Toshkovski foli për përvojat në menaxhimin e krizës së emigrantëve, përballjen me trafikun e drogës dhe krimin e organizuar, si dhe bashkëpunimin operacional me NATO-n, BE-në dhe partnerë të tjerë ndërkombëtarë.
“Maqedonia, pavarësisht burimeve të kufizuara, ka demonstruar aftësinë për të dhënë një kontribut real dhe të matshëm në adresimin e kërcënimeve të sigurisë transnacionale”, theksoi Toshkovski.
Në kuadër të samitit, ai zhvilloi takim dypalësh me Shefin e Policisë së Dubait, Abdullah Khalifa Al Marri, në të cilin shprehu mirënjohjen e tij për mundësinë që vendi ynë të jetë pjesë e një forumi të tillë strategjik.
“U dakorduam të intensifikojmë bashkëpunimin në nivel teknik midis dy institucioneve, me theks në shkëmbimin e njohurive dhe përvojave, veçanërisht në fushën e transformimit dixhital dhe zbatimin e mjeteve të bazuara në inteligjencën artificiale në punën policore”, theksoi ministri Toshkovski.
Toshkovski në Dubai: Maqedonia ka rëndësi të madhe në stabilitetin rajonal dhe sigurinë europiane appeared first on Telegrafi.