Ish-drejtori i Drejtorisë për Mbrojtje dhe Shpëtim dhe kryetari i partisë politike Forcat Demokratike të Romëve, Shaban Saliu, i cili është i përfshirë në hetimin e zjarrit në diskotekën Pulse në Koçan, ku humbën jetën 63 persona dhe u plagosën më shumë se 200, deklaroi sot se nuk ndien absolutisht asnjë përgjegjësi apo faj.
Kur u pyet nga një gazetar për përgjegjësinë e tij në lidhje me rastin e zjarrit në diskotekën Pulse në Koçani dhe faktin se ishte i përfshirë në hetim si ish-drejtor i Drejtorisë për Mbrojtje dhe Shpëtim, ai tha se nuk ndien absolutisht asnjë përgjegjësi.
“Unë absolutisht nuk ndiej asnjë përgjegjësi në këtë drejtim, besoj në vendin tonë, besoj në sistem, besoj në autoritetet gjyqësore, ato do t’i perceptojnë saktë argumentet dhe të gjitha, le të them, momentet e veçanta të atij rasti. Unë jam avokat me profesion dhe jam doktor i çështjeve politike dhe juridike, kam qenë edhe avokat, kam punuar edhe në gjykata. Ia lë ndërgjegjes së shtetit të vendosë nëse jam fajtor apo jo. Personalisht, unë pohoj me gjithë zemër e shpirt se nuk jam absolutisht fajtor”, tha Saliu.
Lidhur me hetimin, ai tha se është i nevojshëm në raste të caktuara.
“Unë udhëhiqem nga iniciativa e përgjithshme ligjore, nga prezumimi i përgjithshëm i pafajësisë, derisa të provohet se dikush është fajtor, ai është i pafajshëm”, tha ai.
Shaban Saliu: Nuk ndiej absolutisht asnjë faj për zjarrin në Koçan appeared first on Telegrafi.