Ish-kryetari i Aleancës për Shqiptarët, Ziadin Sela, është mburrur se është meritori më i madh që Arben Taravari të bëhet politikan.
Në një intervistë për Klan Maqedoni, ai përsëriti se mbetet i mendimit se partia do të garojë e vetme në zgjedhjet e 8 majit. Sipas Selës, koalicioni me opozitën shqiptare nuk garanton ndryshim.
“Në vitin 2016, askush nuk e njihte politikisht Arben Taravarin. Në vitin 2014, 2015 kur nisa Lëvizjen për Reforma, e bëra sekretar të përgjithshëm. Në vitin 2016 ishte i dyti në listën për deputet në zonën zgjedhore numër 1. Humbi. Pas kësaj e bëra ministër të Shëndetësisë, ai përparoi”, tha Sela.
Ai tha se në zgjedhjet lokale të vitit 2017 ka bërë koalicion me Lëvizjen Besa që Taravari të bëhet kryetar i Gostivarit.
Sipas Selës, Taravari ka mbajtur takime të fshehta me liderët e partive opozitare.
“Taravari vendosi që këtë vit t’i anashkalojë organet e partisë, nuk ka ardhur në mbledhje, ka shkuar në takime të fshehta me drejtues të tjerë pa shkuar me të një anëtar tjetër i kryesisë së partisë. Ai tregoi sjellje fëmijërore të papërshtatshme për një udhëheqës. Dhe, ai filloi të pranonte direktiva nga jashtë. Është skandaloze që ka shkuar në një takim me kryeministrin e Kosovës Albin Kurti i vetëm, pa asnjë anëtar të Kryesisë së ASH-së.Përderisa Ziadin Sela merr frymë politikisht në Aleancë, unë nuk kam lejuar dhe nuk do të lejoj që faktorët e jashtëm të kontrollojnë partinë”, tha Sela.
Sela theksoi se shkuarja në zgjedhje e vetme e Aleancës nuk do të thotë se e ndihmon BDI-në./Telegrafi/
Sela: Unë e kam bërë Taravarin politikan, nuk do të lejoj që dikush nga jashtë ta kontrollojë partinë appeared first on Telegrafi.