Qeveria sot do të mbajë mbledhje, në të cilën, siç është paralajmëruar do të marrë vendime në lidhje me situatën në M-NAV, në mesin e të cilave edhe shkarkimin e gjithë udhëheqësisë dhe revizion për punën e deritanishme, pasi javën e kaluar tetë persona, në mesin e të cilëve edhe Bekim Neziri, ish ministër, këshilltar i drejtorit të M-NAV dhe kryetar i degës së BDI-së, sulmuan në zyrat e navigacionit të Maqedonisë së Veriut në aeroportin në Shkup.
“Me nismë të kryeministrit Dimitar Kovaçevski, në konsultim me ministren e Mbrojtjes, Sllavjanka Petrovska dhe ministrin e Transportit dhe Lidhjeve, Bllagoj Boçvarski, ndërsa në bazë të situatës në M-NAV, në mbledhjen e ardhshme të Qeverisë, të caktuar për të martën, 09.01.2024, për zgjidhje të situatës ekzistuese do të propozohen dhe miratohen disa vendime – e gjithë udhëheqësia dhe të gjithë anëtarët e Bordit Drejtues do të shkarkohen; që të hapet procedurë urgjente për zgjedhje të anëtarëve të rinj të udhëheqësisë dhe Bordit Drejtues në proces publik, transparent dhe ligjor”, thuhet në kumtesën e Qeverisë më 4 janar.
Do të thirren, siç ishte paralajmëruar atëherë, Prokuroria Publike, KSHPK, Enti Shtetëror i Revizionit, Policia Financiare dhe organet ndërkombëtare për kontroll në komunikacionin ajror të bëjnë revizion të plotë të punës së deritanishme në M-NAV.
Për incidentin më 4 janar në M-NAV, Prokuroria Themelore Publike në Shkup, siç bëri të ditur ka hapur procedurë hetuese kundër tetë personave për të cilët ekziston dyshimi se si bashkëveprues kanë kryer vepër penale – Rrezikim të sigurisë së komunikacionit ajror sipas nenit 303 paragrafi 2 në lidhje me nenin 22 nga Kodi Penal.
Qeveria sot do të diskutojë për situatën në M-NAV, pritet shkarkimi i drejtorëve appeared first on Telegrafi.
