Kryetari i Qeverisë së Republikës së Maqedonisë së Veriut, Dimitar Kovaçevski, në një video-paraqitje i ka uruar qytetarët për Vitin e Ri. Kovaçevski thotë se viti 2023 nuk ka qenë i lehtë, por shprehet krenar për atë që është arritur.
“Kemi bërë shumë brenda mundësive. Në krizën më të vështirë, ne punuam shumë, të përkushtuar dhe të fokusuar. Ne punuam për ta bërë jetën më të mirë. Kështu që të gjithë të kenë më shumë. Dhe më e rëndësishmja, askush nuk mbeti vetëm! Pagat dhe pensionet janë rritur në nivele historikisht të larta”.
“Sot kemi gati 50% rritje të pensioneve, kemi një pagë minimale dyfish më të lartë dhe një pagë mesatare që tashmë është mbi 600 euro. Ju siguroj se si pagat ashtu edhe pensionet do të vazhdojnë të rriten vitin e ardhshëm! Me masat kundër krizës mbrojtëm dhe ndihmuam standardin e jetesës së familjeve dhe kompanive. Dhe pensionistët, studentët, dhe nxënësit, dhe prindërit e vetëm dhe më të pambrojturit mund të mbështeten tek ne”, thotë Kovaçevski.
Ai gjithashtu thotë se ka pasur dy herë më shumë investime të huaja, ulje të papunësisë dhe rritje të punësimit.
“Para nesh ka vend për të bërë edhe më shumë, për ta bërë atë edhe më të mirë, që pagat dhe pensionet të vazhdojnë të rriten dhe të ndihmojmë drejtpërdrejt dhe në solidaritet më të rrezikuarit. Sepse këto janë vlerat e vërteta maqedonase dhe evropiane. Dhe kështu në këtë moment, besimi, optimizmi dhe mençuria janë më të nevojshmet”.
“Dhe këtë e them jo vetëm si kryeministër, por mbi të gjitha si qytetar, si baba, bashkëshort, bir, si njeri që e sheh të ardhmen këtu, në shtëpi, në vendlindje. Ne kemi nevojë për të gjitha njohuritë që kemi në dispozicion për të arritur qëllimet para nesh. E them shpesh se përparësia jonë, vlera jonë më e madhe dhe pika më e fortë janë njerëzit, qytetarët tanë”.
“Sepse ne kemi kapacitet, kemi njohuri, kemi vullnet për të hedhur hapat e mëtejshëm. Të vazhdojmë të përmirësojmë jetën e qytetarëve. Le të bëjmë gjithashtu atë që është më e rëndësishme – t’i mbajmë të rinjtë në shtëpi. Le t’i kthejmë ata që ikën, sepse rruga evropiane që ne jemi ka filluar dhe nuk do të ndalet. Duhet të shohim përpara, duhet të ecim përpara. Është rruga europiane që do të sjellë zhvillim dhe një të nesërme më të mirë”, thotë Kovaçevski.
Ai më tej shton se në fund të kësaj rruge evropiane është çmimi i madh, anëtarësimi në Bashkimin Evropian.
Kovaçevski uron Vitin e Ri: Kemi bërë shumë, kemi kapacitet dhe vullnet për të hedhur hapat e mëtejshëm appeared first on Telegrafi.
