Sinodi i Shenjtë i Ipeshkvijve të Kishës Ortodokse Maqedonase – Kryepeshkopata e Ohrit (KOM – KO) të enjten mbështeti Kishën Ortodokse të Ukrainës, e cila u ndalua në Ukrainë në gusht për shkak të pretendimeve për lidhje me Rusinë.
Kisha Ortodokse Maqedonase njoftoi se në seancën e rregullt të Sinodit është diskutuar për çështjen e Kishës Ortodokse të Ukrainës.
“Sinodi i kushtoi vëmendje të veçantë situatës me kishën ortodokse ukrainase motër, e cila u shfuqizua administrativisht nga Parlamenti ukrainas, me projektligjin 8371, dhe kështu miliona besimtarëve, që ndjekin kishën, u mohohet e drejta themelore e përkatësisë fetare, shpallja e besimit dhe kryerja e shërbimeve fetare.
Sinodi i Shenjtë i Kishës Ortodokse Maqedonase – Kryepeshkopata e Ohrit, duke dëshmuar për të vërtetën ungjillore, i shpreh mbështetjen lutësore Primatit të Kishës Ortodokse të Ukrainës, Fortlumturisë së Tij Mitropolitit të Kievit dhe mbarë Ukrainës Onufrius, vëllezërve peshkopë dhe popullit të saj besnik, duke u lutur që Zoti i Gjithëmëshirshëm t’u japë atyre forcën për të duruar dhe për t’i kapërcyer këto sprova. Njëkohësisht, Sinodi i Shenjtë lutet për unitetin e të gjitha Kishave Lokale Ortodokse, të cilat përbëjnë Trupin e Krishtit”, thuhet në deklaratën e Sinodit të KOM-KO.
Ukraina është përpjekur të distancohet nga Kisha Ruse që nga viti 2014, megjithëse këto përpjekje u intensifikuan pas fillimit të pushtimit rus të Ukrainës në vitin 2022.
Në Ukrainë njihet Kisha Ortodokse e Ukrainës, autoqefalia e së cilës u njoh nga Patriarkana Ekumenike në vitin 2019, e cila e ndau atë zyrtarisht nga Kisha Ortodokse Ruse./Telegrafi/
Kisha Ortodokse e Maqedonisë e mbështet Kishën Ortodokse të Ukrainës pas ndalimit të saj appeared first on Telegrafi.