Me 85 kallëzime penale për më pak se pesë muaj dhe dëm prej rreth 240 mijë eurosh, Drejtoria e Doganave këtë vit ka zbuluar një shkallë serioze të kriminalitetit doganor. Drejtori Boban Nikollovski thotë se kanë zbuluar një sërë parregullsish në raste të kriminalitetit me automjete të përdorura, si dhe keqpërdorime të dokumenteve doganore gjatë importit të ushqimit, me qëllim shmangien e pagesës së detyrimeve ndaj shtetit.
“Këtë vit, në Prokurorinë Themelore Publike për Ndjekjen e Krimit të Organizuar dhe Korrupsionit, si dhe në Prokurorinë Themelore Publike pranë sektorit për kontroll dhe hetime, janë paraqitur 41 kallëzime penale kundër 32 personave juridikë dhe 118 personave fizikë për vepra penale të kryera me 140 automjete. Dëmi i drejtpërdrejt i shkaktuar në buxhetin e RM-së përmes shmangies së pagesës së detyrimeve arrin në 14,7 milionë denarë, apo 239 mijë euro”, tha Boban Nikolovski – Drejtor i Drejtorisë së Doganave.
Për më tepër, në pesë raste gjatë kontrollit të mishit, doganierët kanë realizuar pagesë shtesë prej pothuajse 180 mijë eurosh, pasi importuesit e kishin tarifuar mishin me norma më të ulëta doganore.
“Në pesë raste gjatë kontrollit të importit të mishit, është realizuar pagesë shtesë prej 11 milionë denarësh ose 178,9 mijë eurosh, ndërsa ndaj kryerësve do të ngrihen kallëzime penale përkatëse në Prokurorinë Themelore Publike, ndërsa për një kryerës do të ngrihet kallëzim për kundërvajtje. Bëhet fjalë për raste kur importuesit e kishin tarifuar mishin me norma më të ulëta doganore me qëllim që të shmangnin pagesën e detyrimeve”, u shpreh Boban Nikolovski – Drejtor i Doganës.
Nikolovski theksoi se në Pikën Kufitare të Pelincës, ku për vite me radhë nuk mbahej mend të kishte pasur ndonjë raport për ndonjë vepër penale, është parandaluar një tentativë për kontrabandë të arit dhe argjendit në vlerë mbi 39 mijë euro.
Drejtori i Doganave: Kemi zbuluar shkallë serioze të kriminalitetit doganor appeared first on Telegrafi.
