Nga Bashkimi Demokratik për Integrim thonë se në Agjencinë për Navigacionin Ajror (M-NAV), nga gjithsej 16 vende pune të shpallura në dy konkurset e fundit, vetëm 2 janë zënë nga shqiptarë, duke shtuar se, një prej tyre djali i deputetes së VLEN-it, Merita Kollçi – Koxhaxhiku.
“Këto të dhëna tronditëse dëshmojnë edhe njëherë realitetin e hidhur të diskriminimit të vazhdueshëm institucional ndaj shqiptarëve, i cili po vazhdon me të njëjtin intensitet pas ardhjes në pushtet të qeverisë së re. Për më tepër, raportimet e Sindikatës së Kontrollorëve të Fluturimit për ndërhyrje politike dhe bllokimin e mbikëqyrjes sindikale gjatë intervistave, konfirmojnë se proceset e punësimit jo vetëm që nuk janë meritore, por shërbejnë si mjet për shpërblime partiake dhe nepotizëm. I ngjajshëm është rasti me punësimin e nipit të Zeqirija Ibrahimit në ushtri, ku në atë konkurs ishte shqiptari i vetëm i pranuar nga gjithsej 74 punësime”.
“Është e papranueshme që në një institucion shtetëror të financuar nga taksat e qytetarëve, shqiptarët të trajtohen si qytetarë të dorës së dytë. Ky rast nuk është i izoluar, por pjesë e një zinxhiri vendimesh diskriminuese që po ndodhin në administratën publike dhe shtetërore, duke i mohuar shqiptarëve përfaqësimin e barabartë që u garantohet me Kushtetutë dhe me Marrëveshjen e Ohrit”, thonë nga BDI.
Gjithashtu BDI i bën thirrje Qeverisë dhe drejtuesve të M-NAV që të anulojnë menjëherë procedurat e kontestuara dhe të sigurojnë transparencë e përfaqësim të drejtë në çdo proces punësimi.
“Mosreagimi ndaj këtyre padrejtësive do të jetë një akt i hapur bashkëpunimi me diskriminimin. Ne mbetemi të vendosur të mbrojmë të drejtën e çdo qytetari për qasje të barabartë në institucionet e shtetit dhe nuk do të lejojmë që pushteti i ri ta kthejë vendin mbrapa, në kohën kur shqiptarët trajtoheshin si të padukshëm në institucione”, thonë nga BDI.
BDI: Diskriminim i hapur ndaj shqiptarëve në M-NAV. 14 maqedonas dhe 2 shqiptarë appeared first on Telegrafi.
