Policia në Australi njoftoi se sulmuesi që vrau gjashtë persona në një sulm me thikë në një qendër tregtare në Sidnei, kishte në shënjestër drejtpërdrejt gratë.
Joel Cauchi, 40 vjeç, u qëllua për vdekje nga policia pasi sulmoi ata që e rrethonin me një thikë të madhe dhe vrau gjashtë persona, pesë gra dhe një burrë. Disa persona, duke përfshirë një foshnjë, u plagosën gjithashtu nga incidenti.
Zyrtarët e policisë thanë në një deklaratë për kanalin ABC News të Australisë se Cauchi u përqendrua te gratë në sulm.
Mashkulli i vrarë ishte Faraz Tahir, një roje sigurie 30-vjeçare që tentoi të ndërhynte në sulm.
Kryeministri Anthony Albanese i tha ABC News të hënën se shpërndarja gjinore është sigurisht shqetësuese.
Autoritetet kishin thënë se sulmi ishte i lidhur me shëndetin mendor të Cauchit.
Qendra tregtare Westfield, ku ndodhi sulmi, është një nga qendrat tregtare më të mëdha dhe më të njohura në vend, dhe ndodhet në një zonë shumë të frekuentuar.
Flamujt në të gjithë vendin do të jenë në gjysmështizë të hënën. /vizionplus.tv
