Presidenti francez Emmanuel Macron vizitoi Britaninë e Madhe të martën, më 8 korrik, ku mbajti një fjalim para Parlamentit britanik, në prani të kryeministrit të ri Keir Starmer.
Në fjalën e tij, Macron theksoi aleancën historike mes dy vendeve, duke kujtuar sakrificat britanike gjatë Luftërave Botërore dhe rolin e Winston Churchill në forcimin e aleancës transatlantike.
Duke folur për situatën në Ukrainë, Macron u shpreh se “Evropa nuk do ta braktisë kurrë Ukrainën”, duke dënuar ashpër agresionin rus dhe duke theksuar nevojën për unitet përballë shkeljes së rregullave ndërkombëtare.
“Çdo herë që Rusia e Putinit avancon në Ukrainë, kërcënimi afrohet për të gjithë ne,” tha ai.
Në lidhje me konfliktin në Lindjen e Mesme, Macron kërkoi armëpushim të menjëhershëm në Gaza, pa kushte, duke theksuar se Evropa nuk mund të ketë standarde të dyfishta dhe se zgjidhja me dy shtete është rruga e vetme drejt paqes.
Lidhur me çështjen e emigracionit, presidenti francez pranoi se dëshira për një jetë më të mirë është legjitime, por paralajmëroi se nuk mund të lejohet shkelja e rregullave nga individë apo grupe kriminale. Ai nënvizoi bashkëpunimin e ngushtë me Britaninë për të gjetur një zgjidhje efektive, përmes koordinimit me vendet e origjinës dhe tranzitit të emigrantëve.
Në fund, Macron tha se largimi i Britanisë nga BE nuk do të thotë largim nga Evropa. Ai bëri thirrje për bashkëpunim të ngushtë mes dy vendeve për të përballuar sfidat ekonomike, shoqërore dhe gjeopolitike: “Nëse nuk bashkëpunojmë, e ardhmja do të jetë e pasigurt.”
