Të paktën 20 palestinezë u vranë dhe shumë të tjerë u plagosën pas sulmeve ajrore izraelite në tre shtëpi në Rafah, që ndodhen në pjesën jugore të Rripit të Gazës, sipas burimeve mjekësore.
Në të njëjtën kohë, ndërmjetësit egjiptianë dhe ata të Katarit pritet të mbajnë një raund të ri bisedimesh për armëpushim me udhëheqësit e Hamasit në Kajro.
Sulmet në Rafah, ku më shumë se një milion njerëz kanë kërkuar strehim për t’i shpëtuar bombardimeve izraelite, erdhën disa orë përpara se Egjipti të priste liderët e grupit islamik Hamas për të diskutuar perspektivat për një marrëveshje armëpushimi me Izraelin.
Forcat e armatosura izraelite njoftuan se janë duke verifikuar informacionin.
Shtytje për marrëveshje
Dje, të dielën, zyrtarët e Hamasit thanë se një delegacion i udhëhequr nga Khalil Al-Haya, nënkryetari i grupit në Gaza, do të diskutonte një propozim armëpushimi të bërë nga Hamasi për ndërmjetësuesit nga Katari dhe Egjipti, si dhe përgjigjen e Izraelit.
Ndërmjetësuesit e mbështetur nga Shtetet e Bashkuara kanë shtuar përpjekjet e tyre për të arritur një marrëveshje.
Dy zyrtarë të Hamasit që folën për Reuters nuk zbuluan detaje të propozimeve të fundit, por një burim i informuar mbi bisedimet i tha Reuters se Hamasi pritet t’i përgjigjet propozimit të fundit të armëpushimit të Izraelit të bërë të shtunën.
Burimi tha se propozimi përfshinte një marrëveshje për lirimin e më pak se 40 pengjeve në këmbim të lirimit të palestinezëve të mbajtur në burgjet izraelite dhe për një fazë të dytë të një armëpushimi që do të përfshinte një “periudhë qetësie të qëndrueshme”.
Pas fazës së parë, Izraeli do të lejojë lëvizjen e lirë midis Rripit jugor dhe verior të Gazës dhe një tërheqje të pjesshme të trupave izraelite nga Gaza, tha burimi.
Një zyrtar i lartë i Hamasit i tha Reuters se bisedimet e sotme në Kajro do të mbahen midis delegacionit të Hamasit dhe ndërmjetësve të Katarit dhe Egjiptit për të diskutuar komentet e bëra nga grupi në lidhje me përgjigjen e Izraelit ndaj propozimit të tij të fundit.
Brigadat Ezzedine al-Qassam, krahu i armatosur i Hamasit, njoftoi se kishte goditur një pozicion ushtarak izraelit me një breshëri raketash të lëshuara nga Libani jugor. Njoftimi është bërë përmes kanalit Telegram të organizatës.
Ushtria izraelite tha se u hodhën 20 raketa, shumica e të cilave u kapën, ndërsa disa ranë në zona të hapura, sipas The Times of Israel.
Bisedimet për armëpushimin po përparojnë, por ne mbetemi të përmbajtur, thotë ministri i Jashtëm francez
Bisedimet për armëpushimin në Gaza po përparojnë, tha sot ministri i Jashtëm francez Stephane Cezournet nga Riadi ku do të takohet me ministra të tjerë arabë dhe perëndimorë, si dhe presidentin e Autoritetit Palestinez, Mahmud Abbas.
“Gjërat po ecin përpara, por në këto bisedime dhe negociata duhet të jeni gjithmonë të kujdesshëm. Situata në Gaza është katastrofike dhe ne kemi nevojë për një armëpushim”, tha ai për Reuters.
