Në një deklaratë të lëshuar sot, Këshilli i Ambasadorëve shpreh shqetësimin e tyre të thellë për situatën e tensionuar në Lindjen e Mesme, veçanërisht pas konfliktit të freskët midis Hamasit dhe Izraelit. Ata evidentojnë se pasojat e kësaj përplasjeje janë të ndjeshme për qytetarët e zonës, veçanërisht për familjet dhe fëmijët e pafajshëm, të cilët vuajnë nga shkatërrimi i pasurive, rreziku për jetën dhe ndikimi psikologjik i kësaj përvoje të dhimbshme.
Ndërkaq, këtë shqetësim e përforcon edhe konteksti më i gjerë i instabilitetit botëror, duke përfshirë përplasjen midis Rusisë dhe Ukrainës.
“Këshilli i Ambasadorëve e mbështet Ministrinë e Punëve të Jashtme të Republikës së Maqedonisë për veprimet që i ndërmerr për mbrojtjen dhe organizimin e kthimit të qytetarëve të Maqedonisë nga territoret e krizës dhe konsideron se të gjitha partitë relevante politike dhe pjesëmarrësit në fushatat politike në zgjedhjet e ardhshme presidenciale dhe parlamentare duhet të kenë parasysh shqetësimin për qytetarët e RMV-së dhe ndërmarrjen e veprimeve specifike në situata të tilla dhe të ngjashme për të harmonizuar pikëpamjet e vendimeve të marra në Kuvend dhe detyrimet që dalin nga anëtarësimi në NATO dhe vazhdimi i negociatave për anëtarësim të plotë në BE”, thuhet në njoftimin e Bordit Ekzekutiv të Këshillit të Ambasadorëve.
Gjithashtu, në një kohë kur tensionet ndërkombëtare janë në rritje, Këshilli i Ambasadorëve mirëpret marrëveshjen për një seancë urgjente të Këshillit të Sigurimit të OKB-së për të diskutuar dhe gjetur një rrugëdalje diplomatike për situatën e krizës. Ata shprehin besimin se një zgjidhje e tillë diplomatike është e domosdoshme për të parandaluar përkeqësimin e situatës dhe për të promovuar paqen dhe stabilitetin në rajon dhe në nivel global.
Mbështetje e Këshillit për MPJ të Maqedonisë në organizimin e kthimit të qytetarëve nga zonat e krizës appeared first on Telegrafi.