“Në mes të një fushate zgjedhore vendimtare, kur qytetarët shqiptarë janë përballë një referendumi historik për të ardhmen e tyre, kryeministri nga Beogradi, me të gjithë kabinetin qeveritar, u ul në Shkup me mikpritjen e Mickoskit dhe VLEN-it. Ky akt është dëshmia më e qartë se Maqedonia e Veriut po rrëshqet drejt statusit të “Republikës së tretë serbe””, kështu reaguan sot nga Bashkimi Demokratik për Integrim.
Nga BDI thonë se raportet ndërkombëtare, përfshirë edhe ato të Parlamentit Evropian, kanë theksuar ndikimin e rrezikshëm të “Botës Serbe” në vendin tonë.
“Sot ky ndikim u vulos me marrëveshje të reja, të shitura si “bashkëpunim ekonomik” dhe “stabilitet rajonal”, por që në të vërtetë përfaqësojnë vetëm një kapje të plotë të shtetit nga Beogradi, me bekimin e VLEN-it. Faktet flasin vetë:• Emërimi i Ivan Stoilkoviçit si zëvendëskryeministër për Marrëveshjen e Ohrit;• Pranimi i donacioneve serbe për ndërtimin e kishave në Tetovë;• Pritja me ceremoni shtetërore e Millorad Dodikut në Shkup;• Shënimi i betejave serbe në Manastir nga ministrat serbë, si “luftë serbe në tokat e tyre”;• Pjesëmarrja e Kishës Ortodokse Serbe në ceremonitë shtetërore;• Kryqi ilegal në Kodrën e Diellit, i ndriçuar gjatë natës si simbol i pushtimit;• Nënshkrimi i kontratave të energjetikës nga drejtorët e VLEN-it me kompani serbe;• Depërtimi i kompanive serbe në telekomunikacion;• Defilimi i ministrave serbë në Shkup me gjuhë pushtuese, duke quajtur Maqedoninë dhe Kosovën “toka serbe” dhe masakrat “çlirim”. Dhe së fundmi, më 10 shtator, kur zonja Bujare Abazi, kryetare e Komisionit për Letrat me Vlerë, lejoi hyrjen e bankës serbe “Alta Banka” në tregun financiar të Maqedonisë së Veriut. Ky është një krim institucional, i firmosur dhe vulosur nga VLEN, që i hap rrugë depërtimit financiar të Serbisë në zemër të ekonomisë sonë”, thuhet në reagimin e BDI-së.
Nga BDI pyesin se çfarë u diskutua në takimet e djeshme mes Beogradit dhe Shkupit dhe pse mbahet si sekret shtetëror?
“Për çfarë u dakorduan dy qeveritë në dëm të interesave të shqiptarëve?• Cilat fusha të tjera do t’i dorëzohen ndikimit serb?
E vërteta është e thjeshtë: Mickoski dhe VLEN janë vegla të “Botës Serbe”, ndërsa shqiptarët po e paguajnë dhe do ta paguajnë çmimin e këtij servilizmi. BDI riafirmon se do të qëndrojë fuqishëm në krah të shqiptarëve, në mbrojtje të Marrëveshjes së Ohrit, të gjuhës shqipe dhe të interesave kombëtare. Këto nuk mund të negociohen, nuk mund të shiten në tryezat e Beogradit dhe nuk do të lejojmë kurrë që sakrificat e gjeneratave shqiptare të tradhtohen për interesa pushteti”, thonë nga BDI.
