Kandidati i koalicionit VLEN për kryetar të Komunës së Sarajit, Muhamed Elmazi, ka qenë i ftuari i radhës në emisionin PodGo, në edicionin për zgjedhjet lokale.
Ai prezantoi planet dhe projektet e tij nëse zgjidhet kryetar i Komunës së Sarajit, duke thënë se në ditët e para si kryetar do të bëjë revizion të punës së udhëheqësisë së kaluar. Elmazi tha se ka projekte konkrete për infrastrukturën, arsimin, si dhe turizmin malor.
– YouTube Prodhim i Telegrafi Maqedoni Bejeni #Subscribe kanalin tonë në YouTube për më shumë video. Detajet: …
Ekipi dhe administrata
Unë e njoh nga afër shumicën e administratorëve të Komunës së Sarajit. I kam shokë një pjesë të madh të tyre dhe ua njoh kapacitetet. Pas zgjidhjes sime si kryetar komune, nuk do të ketë ndryshime drastike në administratë. Në disa sektorë ku ka nevojë do të angazhojmë edhe ekspertë, ndërsa kuptohet kabineti i kryetarit bëhet nga ai, shefi i kabinetit, i cili duhet të jetë njeriu i besueshëm.
Jo vetëm administrata komunale, por edhe arsimtarët, edhe administratorët në Qytetin e Shkupit, që nuk kanë vendime pune, nuk do t’u rrezikohet vendi i punës. Këtë garë nuk e bëjmë për hakmarrje politike. NOMAGAS-in e trashëgova me vetëm 11 të punësuar shqiptar, nga 83, pra nuk kishte përfaqësim të drejtë dhe adekuat. Për 11 muaj arritëm të punësojmë rreth 20 shqiptarë të rinj, ndërsa shqiptarët që kanë qenë vazhdojnë të jenë atje dhe janë bashkëpunëtorë të mi, edhe pse u takojnë partive tjera.
100 ditët e para
I kam detektuar problemet që ballafaqohet komuna e Sarajit. Do të thërrasim revizion shtetëror, për të pasur pasqyrim të qartë, borxhin dhe punët që janë bërë. Dhe do të përgatisim planprogramin dhe buxhetin për vitin 2026. Që nga viti 2026 do të fillojmë me realizim të projekteve. Që nga dita e parë do të fillojmë me punë.
Arsimi
Tani flasim për inteligjencën artificiale, por kur ballafaqohesh me problemet reale, e sheh se shumë shkolla nuk kanë as kushtet bazë. Në plaprogramin tim janë katër shkolla që nuk plotësojnë asnjë kusht elementar: shkolla e Matkës, Shishovës, Svillares së Epërme dhe Llaskarcës, mendojmë të bëjmë ndërtesa të reja, ndërsa shkollat tjera do të restaurohen. Do të ketë dhoma të veçanta për fëmijët me aftësi të kufizuara. Gradualisht do të investojmë në IT, në programim, për nxënësit e dalluar që t’ua mundësojmë të ecin para.
Uji, rrugët dhe kanalizimi
Pikë e parë është infrastruktura nëntoksore dhe rrugore. Burimi i ujit për gjithë Shkupin vjen nga qyteti jonë. Ndërsa ne ballafaqohemi me të njëjtën problematik. Madje në fshatin Rahçe, ku ka burim uji, gjatë verës nuk kanë ujë të pijshëm. Do të angazhohem që për një mandat të plotë ta përfundojmë këtë problematikë. Nëse nuk e bëjë këtë, nuk do të kërkojë më mbështetje politike. Këtë mandat që shkoi Komuna e Sarajit fitoi mbështetje nga Qyteti i Shkupit prej 179 milion denarë. Janë bërë disa punë, por për shkaqe teknike nuk është lëshuar ajo pjesë ku janë bërë instalime të reja. Në Ministrinë e Ekologjisë, në vendbanimet ku nuk ka rrjet të ujit të pijshëm, do ta instalojmë, si në Seminisht, Çajlanë, Vorcë dhe Radushë.
Për rrugë më të mira, si projekt më të madh e veçoj rrugën “Dardania” në Saraj, ku morëm mbështetje nga zv.kryeministri Izet Mexhiti. Para kësaj jave ishim në takim në Qeveri dhe mu dha garanca se këtë rrugë mund ta fus si projekt në qeveri.
Çerdhet
NË saraj kemi dy çerdhe. Ndërsa ne kemi tre lokacione ku shpresojmë se do të realizojmë çerdhe. Një në Svillare të Poshtme, një në Bukoviç, dhe për mua është më e rëndësishme është në Çërçec, apo në vendbanimin e të pastrehuarve. Gjithahtu synojmë që të ulim kohën e pritjes për regjistrimin e fëmijëve në çerdhe.
Turizmi malor
Kemi plan konkret për zhvillim të turizmit. Kemi dy lumenj në Saraj, kemi Matkën, Treskën, kemi ujëvarë në Svillare të Epërme, pra kemi shumë pasuri natyrore, por fatkeqësisht i kemi shndërruar në deponi të egra. Në pjesën e parë do të pastrojmë deponitë, do të mbjellim fidanë të reja për ta ngjallur ato vende. Kemi plan konkret edhe për Malin e Thatë, ku dëshirojmë ta bëjmë për kalërim dhe gjueti, njëjtë edhe pjesën e Matkës së Epërme. Projektantët për Sarajin kanë plane edhe për urbanizim të kësaj pjese, pra për të ndërtuar shtëpiza.
