Zëvendësministri i Ekonomisë dhe Punës Marjan Risteski, njoftoi se një propozim, të cilin me siguri do ta pranojnë, është që disa herë të rriten gjobat, nga 20.000 euro sa janë tani në më shumë mjete fiannciare, për mosrespektimin e Ligjit për praktika të padrejta tregtare.
“Një nga propozimet, të cilin me siguri do ta pranojmë për respektim më të madh të Ligjit për praktika të padrejta tregtare është rritja e politikës ndëshkuese. Propozimi është gjoba e tanishme prej 20.000 euro disa herë të rritet gjë që nuk është shumë duke pasur parasysh se po flasim për supermarkete dhe kompani tregtare në vend. Ndryshe, inkurajoj kompanitë nga rajoni, veçanërisht për prodhimin e ushqimit, të raportojnë shkeljet ligjore në KMK”, deklaroi Risteski.
Risteski tha se janë fokusuar në kontrollet inspektuese për zbulimin e ekonomisë gri, mbrojtjen e standardit jetësor, stabilizimin dhe uljen e inflacionit.
“Komisioni për Mbrojtjen e Konkurrencës dhe Inspektorati Shtetëror i Tregut vazhdimisht janë në terren duke ndjekur raportet, por edhe duke ndjekur qëndrimet e tyre sepse kanë një program vjetor pune. Kudo që konstatohen shkelje ligjore, subjektet juridike do të ndëshkohen. Mendoj se jemi në rrugën e duhur për ta bërë këtë. Shikoj që inflacioni tashmë po stabilizohet, duke filluar të ulet pak, veçanërisht në aspektin e produkteve themelore ushqimore. Edhe pse kjo nuk është e mjaftueshme, besojmë se në periudhën e ardhshme me një politikë kaq të mirë do të jemi në gjendje të mbrojmë më mirë standardin e jetesës së qytetarëve dhe që inflacioni të jetë në një nivel të qëndrueshëm, do të thoja, evropian. Po përqendrohemi në kontrollet inspektuese dhe në shpalljen transparente të çmimeve”, tha Risteski.
Ai sqaroi se nga nëntori i vitit të kaluar deri në shtator të këtij viti, Inspektorati Shtetëror i Tregut ka bërë 18.000 mbikëqyrje inspektuese në nivel shtetëror dhe janë shqiptuar dënime në vlerë prej rreth 120 milionë denarë urdhëresa pagesore për dënime për mosrespektimin e rregulloreve ligjore.
