BDI sot ka shprehur shqetësim serioz për drejtimin që ka marrë politika e jashtme dhe e brendshme e vendit, në një kohë kur Maqedonia e Veriut ka nevojë për orientim të qartë drejt Bashkimit Evropian dhe bashkërendim të aktiviteteve brenda NATO-s.
Nga atje thonë se në vend të përforcimit të lidhjeve me partnerët tanë strategjikë, po promovohet një retorikë dhe praktikë që ngjall nostalgji për projekte të rrezikshme si “bota serbe”, me tendenca të hapura proruse dhe pro-hungareze.
“Ndërkohë që flitet për “marrëdhënie të veçanta ekonomike” me Hungarinë dhe për ndërtimin e një “regjioni të përbashkët” me Serbinë, qëllimisht heshtet për Korridorin 8, një projekt strategjik që e lidh Maqedoninë me Shqipërinë dhe Bullgarinë, dy shtete anëtare të NATO-s dhe të BE-së. Në të njëjtën kohë, prioritet i jepet Korridorit 10, që e shtyn vendin drejt një boshti të padeklaruar lindor, i huaj për vlerat evropiane dhe për interesat afatgjata të qytetarëve tanë.
Këto zhvillime marrin kuptim të plotë në dritën e vizitës së fundit të Millorad Dodikut në Shkup, i njohur për retorikën e tij anti-perëndimore dhe lidhjet e thella me Moskën dhe Beogradin. Gjatë një pritjeje zyrtare të organizuar nga kreu shtetëror, Dodik e shfrytëzoi fjalimin e tij publik për të rritur euroskepticizmin në opinionin vendor, duke sfiduar hapur orientimin euroatlantik të vendit. Kjo nuk është thjesht simbolikë politike, është strategji e koordinuar që vjen në një kohë kur ndikimi i Qeverisë së Serbisë mbi institucionet tona po rritet ndjeshëm. Gjithashtu, kohëve të fundit janë prezente edhe donacione nga subjekte me prejardhje serbe, siç është rasti në Tetovë.
Për më tepër, përfshirja e figurave të larta fetare të vendeve të huaja me prirje lindore në aktivitete shtetërore, nën patronazhin e Qeverisë aktuale, përforcon një agjendë me prirje antiperëndimore, në kohën kur vendi ka nevojë për përqendrim të palëkundur në rrugën euroatlantike.
Si rezultat, po zhvendosen edhe prioritetet shtetërore, dhe vendi rrezikon të humbasë jo vetëm shansin për integrim, por edhe për një zhvillim të barabartë dhe të qëndrueshëm rajonal. Korridori 10, që e orienton vendin drejt jugut e lindjes, është vendosur përpara Korridorit 8, megjithëse ky i fundit është lidhja jonë më e drejtpërdrejtë me dy anëtare të NATO-s dhe me tregun evropian. U tha se ndryshimet kushtetuese do të bëhen ne një afat 3 deri 6 mujor nga formimi i qeverisë, për të përfunduar sot në një vorbull ku fare nuk flitet më për të njëjtat, ndërsa integrimi ka shënuar regres në vend të progresit”, akuzojnë nga BDI.
Kjo qasje, shtojnë nga atje, përfaqëson një logjikë të rrezikshme antiperëndimore, që jo vetëm e komprometon pozicionin e vendit në procesin e negociatave me BE-në, por rrezikon seriozisht edhe progresin e arritur ndër vite në marrëdhëniet ndëretnike. Të përbashkëtat tona me Perëndimin nuk janë vetëm strategjike, ato janë vlerore: demokracia, barazia, bashkëjetesa dhe shteti funksional./Telegrafi/
BDI: Jo për “botën serbe” në Maqedoni, po rrugës së sigurt euroatlantik appeared first on Telegrafi.