E ardhmja e Edon Zhegrovës duket se do të jetë e lidhur me futbollin italian.
Ylli kosovar ka arritur marrëveshje personale me Juventusin.
Për këtë siguron mediumi italian, “Tuttosport”, i afërt me gjigantin italian.
Mediumi italian tutje nënvizon se, nëse gjithçka shkon sipas parashikimeve, 26-vjeçari do ta nënshkruajë një kontratë afatgjate me “Zonjën e Vjetër” dhe në Torino do të paguhet 2,5 milionë euro në vit.
Më saktësisht, ish-futbollisti i Baselit mund ta hedh të zezën mbi të bardhë për një periudhë pesëvjeçare me gjigantin italian.
Ndërkohë, tash iu mbetet “Bianconeri” që ta gjejnë gjuhën e përbashkët me klubin e futbollistit, Lille.
Francezët i kërkojnë 25 milionë euro për kartonin e përfaqësuesit kosovar, kurse italianët janë të gatshëm t’i paguajnë 20 milionë, duke e pasur parasysh se anësori ofanziv e ka vetëm edhe një vit kontratë.
Majtaku këmbëshpejtë e kishte njoftuar muaj më parë Lillen se s’do ta vazhdonte kontratën dhe drejtuesit e klubit duan ta shesin në këtë verë lojtarin për të mos e humbur pa para në verën e ardhshme.
Juve synon t’ia bashkojë sulmuesit Jonathan David edhe një tjetër ish-futbollist të Lillet, duke nënshkruar me futbollistin ofanziv nga Kosova.
Dyshja kishte shkëlqyer së bashku në sezonin e kaluar tek ekipi francez.
Interesim për Zhegrovën së fundmi ka shfaqur edhe Olympique Marseille, por dëshirë e futbollistit është të largohet nga Franca për ta bërë një hap përpara në karrierë.
Qe një kohë, interesim për të kishte shfaqur edhe Napoli në Itali, por së fundmi napolitanët janë tërhequr nga “Messi i Kosovës”.
Zhegrova nuk ka luajtur në ndeshje zyrtare që nga dhjetori i vitit të kaluar shkaku i një lëndimi, ndërsa për një kohë u la edhe jashtë ekipit në stërvitje.
Në javët e fundit po ushtron me Lillen, por mendjen e ka diku tjetër…
Zhegrova merret vesh me Juventusin, zbulohet edhe rroga e tij / shkruan Gazeta Online Reporteri.net.
