Mbi 200 mijë kërkesa janë bërë për t’u pajisur me bileta për ndeshjen e “Arenës Kombëtare”, e vlefshme për kualifikimet e Botërorit 2026, shkruan “Gazeta Express”.
Të vetëdijshëm për këtë interesim të tifozëve janë edhe serbët.
Selektori Dragan Stojkoviq madje thotë se në Shqipëri do të bëheshin dy milionë tifozë nëse do t’i zinte stadiumi.
Gjithashtu, trajneri serb nuk pret që kjo ndeshje të sjell probleme pasi insiston se raportet mes dy Federatave janë mjaft të mira.
“Është një ndeshje jashtëzakonisht e rëndësishme për ata dhe për ne. Por, është vetëm ndeshje. Janë miqtë tanë të futbollit, do ta organizojmë bashkë Evropianin për të rinj. Në këtë ndeshje do ta shikojmë vetëm aspektin sportiv. Terreni do të tregojë kush është më i mirë. Kurrfarë tensionesh politike, kurrfarë porosi të tifozëve, kurrfarë deklaratash të disa të çmendurve që duan të krijojnë gjendje lufte, nuk na interesojnë dhe nuk do të jetë ashtu. Jam i bindur se do të kemi pritje shumë të mirë dhe që organizimi i ndeshjes do të jetë plotësisht nën kontroll dhe nuk mund të ndodhë asgjë e jashtëzakonshme që mund të na shokojë”, deklaroi Stojkoviq në konferencë për shtyp sot.
Natyrisht, ai është i vetëdijshëm se atmosfera në qytet dhe në stadium do të jetë e zjarrtë, gjë që e sheh të pritur duke e pasur parasysh historinë dhe të kaluarën mes dy popujve.
“Nga përvoja e di që do të kemi pritje të mirë, në kuptimin e mikpritjes, njëjtë si në ndeshjen e revanshit te ne. A do të qëndrojnë shikuesit ulur në tribuna dhe të shikojnë? Natyrisht që do të anojnë, që do të provojnë të na dekoncentrojnë. Do të tentojnë të bëjnë gjithë atë që e bëjnë tifozët për ekipin e tyre. Por, terreni është ai që e sjell rezultatin. Kështu që ne jemi plotësisht të fokusuar që ta luajmë ndeshjen dhe në këtë frymë edhe po përgatitemi”, vazhdoi trajneri serb.
Tutje, Stojkoviq nuk e ka fshehur dëshirën dhe synimin për të fituar në kryeqytetin shqiptar, ndërsa i vlerësoi lartë kundërshtarët e së shtunës.
“Vlerësoj se Shqipëria është ekip jashtëzakonisht i mirë, të mos i numërojë lojtarët që luajnë në top-pesë ligat evropiane. Është ekip shumë i mirë dhe shumë i fortë. Por, kjo nuk do të thotë se ne do të shkojmë për t’u mbrojtur apo me flamur të bardhë. Këtë nuk do ta shihni”, nënvizoi ai.
“200 mijë të interesuar për bileta? Dy milionë, vetëm që nuk ka stadium me atë kapacitet, asnjë në botë. Më thonë që i kanë kërkuar dy milionë bileta. Por është gjithnjë rrëfimi i njëjtë. Gjithnjë ngrihet tension i njëjtë. Është atmosferë normale para një ndeshjeje të rëndësishme. Natyrisht se rivaliteti ekziston dhe do të ekzistojë gjithnjë. Por, ne i shohim si miq të sportit dhe ata na shohin njëjtë. E di që raportet mes dy Federatave janë në nivel jashtëzakonisht të lartë. Lojtarët janë mjaftueshëm me përvojë që ta përballojnë këtë atmosferë elektrizuese. Nuk janë fëmijë që janë për herë të parë në stadium. Pres reagim të shkëlqyer dhe një Serbi të vendosur për atë që do që ta fitojë ndeshjen”, përfundoi Stojkoviq.
Trajneri i Serbisë: Me shqiptarët jemi miq të futbollit, në stadium do të vinin dy milionë tifozë / shkruan Gazeta Online Reporteri.net.
