Skuadra e Baselit ndodhet aktualisht në Austri ku po zhvillon fazën përgatitore për sezonin e ardhshëm, si në kampionatin zviceran ashtu edhe në arenën evropiane.
Të martën pasdite, para gazetarëve zviceranë doli Xherdan Shaqiri, kapiteni dhe lideri i ekipit.
“Gjendja është pozitive. Po punojmë me intensitet të lartë, dhe kjo është thelbësore. Synimi ynë është të arrijmë formën optimale për sfidat në kualifikimet e Ligës së Kampionëve”, deklaroi Shaqiri.
Mesfushori ofensiv 33-vjeçar, i cili sezonin e kaluar i printe ekipit drejt dy trofeve – titullit kampion dhe Kupës së Zvicrës – u pyet nëse përgatitjet fizike bëhen më të vështira me kalimin e viteve.
Ai u shpreh se për të, çdo herë kjo pjesë ka qenë sfiduese.
“Kur ke më shumë eksperiencë, fillon të kuptosh më mirë aspektet fizike dhe menaxhimin e energjisë. Lojtarët e rinj janë duke u zhvilluar mirë në këtë drejtim. Unë jam më tepër një lojtar kreativ, ndaj ndonjëherë duket sikur jam ende në kulmin tim si para dhjetë vitesh. Por pas ndeshjeve, rikuperimi është më i rëndësishëm se më parë”, shtoi ai.
Shaqiri theksoi gjithashtu se e njeh më mirë trupin e vet dhe është më i vetëdijshëm për nevojat që ka për të qëndruar në formë. “Por ndihesha jashtëzakonisht mirë në këto ditë të para”, tha ai.
Në fund, foli edhe për teknikun e ri të skuadrës, Ludovic Magnin, për të cilin u shpreh me nota pozitive: “Ai është njeriu i duhur për këtë projekt. Ka energjinë dhe vizionin që i duhet ekipit tonë”./Express
Shaqiri flet për sezonin e ri me Baselin, trajnerin e ri dhe kualifikimet e Ligës së Kampionëve / shkruan Gazeta Online Reporteri.net.
